سری نگر: محکمہ موسمیات نے جموں وکشمیر میں اگلے 48 گھنٹوں کے دوران مزید بارشوں کی پیش گوئی کی ہے۔
متعلقہ محکمے کے ایک ترجمان نے بتایا کہ جموں و کشمیر میں یکم ستمبر کو موسم عام طور پر خشک رہنے کا امکان ہے تاہم دوپہر کے بعد کہیں کہیں ہلکی بارشوں کا امکان ہے اور جموں صوبے کے کچھ علاقوں میں یکم ستمبر کی شام سے 2 ستمبر کی صبح تک شدید بارشیں ہوسکتی ہیں۔
انہوں نے کہا کہ 2 اور 3 ستمبر کو موسم عام طور پر ابر آلود رہ سکتا ہے اور اس دوران کئی مقامات پر ہلکی سے درمیانی درجے کی بارشیں متوقع ہیں۔
ان کا کہنا ہے کہ جموں صوبے کے کٹھوعہ، جموں، اور ریاسی ضلاع میں کہیں کہیں شدید بارشیں جبکہ ڈوڈہ، سامبہ، راجوری، پونچھ، رام بن، کشتواڑ، اننت ناگ اور کولگام اضلاع میں 2 ستمبر کی شام سے 3 ستمبر کی دو پہر تک درمیانی سے بھاری بارشیں متوقع ہیں۔
ان کا کہنا ہے کہ بعد میہں 4 سے 7 ستمبر تک موسم عام طور پر خشک رہنے کا امکان ہے تاہم اس دوران بھی کہیں کہیں ہلکی بارشوں کا امکان ہے۔
محکمے نے اپنی ایڈوائزری میں کہا ہے کہ اس دوران خاص کر جموں صوبے میں کہیں کہیں بادل پھٹنے، سیلابی ریلے آنے، لینڈ سلائیڈنگ ہونے اور چٹانیں کھسک آنے کے بھی خطرات ہیں۔
ایڈوائزری میں کہا گیا کہ دریائوں اور ندی نالوں میں پانی کی سطح بڑھ سکتی ہے اور خاص طور پر جموں کے نشیبی علاقوں میں پانی بھی جمع ہوسکتا ہے۔
لوگوں سے احتیاط برتنے کی اپیل کی گئی ہے۔
