تیانجن/نئی دہلی، :وزیر اعظم نریندر مودی نے دہشت گردی کو پوری انسانیت کے لیے ایک مشترکہ چیلنج قرار دیتے ہوئے کہا ہے کہ دہشت گردی کی تمام شکلوں کا مل کر مقابلہ کرنا سب کی ذمہ داری ہے۔
پیر کو یہاں شنگھائی تعاون تنظیم (ایس سی او) کے سربراہان مملکت کے 25ویں سربراہی اجلاس سے خطاب کرتے ہوئے مسٹر مودی نے دہشت گردی کے معاملے پرسختی سے ہندوستان کا موقف پیش کیا اور کہا کہ ہندوستان کو گزشتہ چار دہائیوں سے بے رحم دہشت گردی کا سامنا ہے۔ انہوں نے کہا کہ دہشت گردی پوری انسانیت کے لیے مشترکہ چیلنج ہے۔
وزیراعظم نے کہا کہ سلامتی، امن اور استحکام کسی بھی ملک کی ترقی کی بنیاد ہوتی ہے۔ انہوں نے کہا کہ دہشت گردی، علیحدگی پسندی اور انتہا پسندی اس راستے میں بڑے چیلنجز ہیں۔انہوں نے کہا کہ دنیا نے پہلگام میں دہشت گردی کا مکروہ چہرہ دیکھا ہے۔ انہوں نے کہا کہ یہ حملہ نہ صرف ہندوستان کی روح پر بلکہ انسانیت پر یقین رکھنے والے ہر ملک کے لیے ایک چیلنج ہے۔
کسی بھی ملک کا نام لیے بغیر مسٹر مودی نے دہشت گردی کی حمایت کرنے والے ممالک پر تنقید کرتے ہوئے کہا کہ کیا دہشت گردی کو کچھ ممالک کی حمایت ہمیں قبول ہوسکتی ہے۔ انہوں نے دہشت گردی کے خلاف لڑائی میں اتحاد پر زور دیتے ہوئے کہا کہ ہر قسم کی دہشت گردی کی مخالفت کرنا ہماری ذمہ داری ہے۔
مسٹرمودی نے ان ممالک کا شکریہ ادا کیا جو پہلگام دہشت گردانہ حملے کے بعد ہندوستان کے ساتھ کھڑے تھے۔ دہشت گردی کی مالی معاونت کے خلاف ہندوستان کی مہم کا حوالہ دیتے ہوئے انہوں نے کہا ’’دہشت گردی ایک ملک کی سلامتی کے لیے ہی نہیں، بلکہ پوری انسانیت کے لیے ایک مشترکہ چیلنج ہے۔ کوئی بھی ملک، کوئی معاشرہ، کوئی بھی شہری اس سے خود کو محفوظ نہیں سمجھ سکتا۔ اس لیے ہندوستان نے دہشت گردی کے خلاف لڑائی میں اتحاد پر زور دیا ہے… ہندوستان نے القاعدہ اور اس سے منسلک دہشت گرد تنظیموں کے خلاف مشترکہ آواز اٹھاتے ہوئے اپنی آواز بلند کی ہے۔ میں اس میں آپ کے تعاون کا شکریہ ادا کرتا ہوں۔‘‘
یو این آئی
