سری نگر: مرکزی وزیر کرن رجیجو نے منگل کو اطلاع دی کہ ان کے قافلے سے کچھ فاصلے پر ایک گاڑی حادثاتی طور پر دریا میں جاگری، تاہم خوش قسمتی سے دونوں سوار افراد کو زندہ بچا لیا گیا۔

رجیجو نے ایک مختصر بیان میں بتایا کہ یہ واقعہ دراس پہنچنے سے قبل پیش آیا۔ انہوں نے کہا کہ ہمارے قافلے سے آگے ایک گاڑی اچانک دریا میں گر گئی، لیکن ہم بروقت وہاں پہنچے اور دونوں افراد کو بچا لیا گیا۔

وزیر کے مطابق حادثے کے بعد سکیورٹی اہلکاروں نے فوری طور پر ریسکیو آپریشن شروع کیا جس کے نتیجے میں دونوں مسافروں کی جان بچائی جا سکی۔

خیال رہے کہ کرن رجیجو لداخ کے دورے پر ہیں۔

سری نگر: وادی کشمیر کی موجودہ موسمی صورتحال کے پیش نظر بڈگام پولیس نے منگل کے روز عوام کی مدد اور پریشانی کی صورت میں فوری کارروائی کو یقینی بنانے کے لیے ایک ہنگامی ہیلپ لائن سروس کا قائم کی۔

ایک پولیس ترجمان نے بتایا کہ بڈگام میں پولیس کنٹرول روم کو ہنگامی حالات کے دوران لوگوں تک پہنچنے کے لیے لینڈ لائن اور موبائل رابطہ نمبروں کے ساتھ چوبیس گھنٹے فعال بنایا گیا ہے۔

انہوں نے کہا کہ شہری دن کے کسی بھی وقت 01951-255207 ڈائل کر سکتے ہیں یا فون نمبرات 8082567612 اور 6006751939 پر کال کر سکتے ہیں۔
ان کا کہنا ہے کہ کنٹرول رومز کے قیام کے علاوہ سینئر افسران بشمول ایس ایس پی بڈگام، ایڈیشنل ایس پی، ڈی وائی ایس پیز اور مختلف سب ڈویژنوں کے ایس ڈی پی اوز کے ساتھ ساتھ تمام تھانوں کے ایس ایچ اوز اور پولیس چوکیوں کے انچارج افسران کو نامزد رابطہ نمبروں کے ذریعے عوام تک براہ راست رسائی کے قابل بنایا گیا ہے۔

بڈگام پولیس نے لوگوں سے اپیل کی کہ وہ محفوظ رہیں اور کسی بھی ہنگامی صورتحال کی اطلاع فوری طور پر کنٹرول روم یا قریبی پولیس یونٹوں کو دیں تاکہ فوری کارروائی کی جاسکے۔

سری نگر: جموں و کشمیر کے وزیر اعلیٰ عمر عبداللہ نے منگل کی صبح یہاں جموں صوبے میں ہو رہی مسلسل بارشوں کے پیش نظر سیلابی صورتحال سے نمٹنے کے اقدامات کا جائزہ لینے کے لئے ایک میٹنگ کی صدارت کی۔

انہوں نے افسروں کو ہائی الرٹ پر رہنے اور تمام ضروری اقدام کرنے کی ہدایت دی۔

واضح رہے کہ جموں صوبے میں گذشتہ چوبیس گھنٹے سے مسلسل موسلا دھار بارش ہو رہی ہے جس کے نتیجے میں خطے میں سیلابی صورتحال پیدا ہوئی ہے۔

حکام نے لوگوں کے جان ومال کے تحفظ کو یقینی بنانے کے لئے احتیاطی تدابیر جاری کی ہیں اور ہلپ لائن نمبر جاری کئے ہیں۔

وزیر اعلیٰ کے دفتر کے ‘ایکس’ ہینڈل پر ایک پوسٹ میں کہا گیا: ‘ وزیر اعلیٰ نے آج صبح جموں میں مسلسل بارشوں کے پیش نظر سیلاب سے نمٹنے کے اقدامات کا جائزہ لینے کے لئے ایک میٹنگ کی’۔

انہوں نے افسران کو ہائی الرٹ رہنے اور تمام ضروری اقدامات کرنے کی ہدایت کی۔

ادھر محکمہ موسمیات نے جموں وکشمیر میں اگلے کچھ گھنٹے کے دوران مزید بارشوں کی پیش گوئی کی ہے۔

سری نگر: وزارت داخلہ کی پارلیمانی کمیٹی کا ایک پینل ماہ ستمبر کے پہلے ہفتے میں جموں وکشمیر کا دورہ کر رہا ہے جس کے لئے تمام تر تیاریوں کو حتمی شکل دی جا رہی ہے۔

واضح رہے کہ یہ پینل 26 اپریل کو دورہ جموں وکشمیر کرنے والا تھا لیکن 22 اپریل کو پہلگام کی بیسرن وادی میں ہونے والے دہشت گردانہ حملے کے پیش نظر اس دورے کو موخر کر دیا گیا تھا۔

ذرائع نے بتایا کہ پارلیمانی کمیٹی برائے امور داخلہ کے ایک پینل کا ماہ ستمبر کے پہلے ہفتے میں دورہ جموں وکشمیر متوقع ہے جو کم و بیش 6 دنوں پر محیط ہوگا۔

انہوں نے کہا کہ بی جے پی کے رکن رادھا موہن داس اگروال کی قیادت میں یہ پینل 31 ممبروں پر مشتمل ہوگا جس میں پرینکا گاندھی، کپل سبل جیسے ممتاز لیڈر شامل ہوں گے۔

ذرائع کے مطابق دورے کے دوران یہ پینل مختلف وفود سے ملے گا اور وادی کے مختلف علاقوں کا بھی دورہ کرے گا۔

دریں اثنا صوبائی کمشنر کشمیر انشول گرگ نے مذکورہ کمیٹی کے دورے کے پیش نظر انتظامات کا جائزہ لینے کے لیے ایک میٹنگ کی صدارت کی۔

اس موقع پر انہوں نے سری نگر، گلمرگ اور سونہ مرگ میں معززین کے لیے رہائش کی سہولیات کا تفصیلی جائزہ لیا اور ساتھ ہی گاڑیوں کی الاٹمنٹ اور رابطہ افسران کی تقرری کا بھی جائزہ لیا۔

متعلقہ محکموں کے درمیان قریبی تال میل اور ہم آہنگی کو یقینی بنانے کے لیے ڈپٹی ڈائریکٹر پلاننگ، عاشق حسین ملک کو نوڈل آفیسر مقرر کیا گیا۔

سری نگر،: محکمہ موسمیات کی ایڈوائزری کے مطابق جموں وکشمیر کے کچھ علاقوں میں اگلے چوبیس گھنٹوں کے دوران تیز اور شدید بارشوں کا امکان ہے۔

انہوں نے کہا کہ اس دوران کہیں کہیں بادل پھٹنے، سیلابی ریلے آنے، لینڈ سلائیڈنگ ہونے اور چٹانیں کھسکنے کے بھی خطرات ہیں۔

لوگوں سے کہا گیا ہے کہ دریائوں، ندی نالوں اور کمزور تعمیراتی ڈھانچوں کے نزدیک جانے سے احتراز کریں۔
متعلقہ محکمے کے ایک ترجمان نے بتایا کہ جموں وکشمیر میں 25 اور 26 اگست کو ہلکی سے درمیانی درجے کی بارشوں کا امکان ہے۔

انہوں نے کہا کہ اس دوران صوبہ جموں کے جموں، ریاسی، اودھم پور، سامبہ، کٹھوعہ اور راجوری اضلاع کے کچھ علاقوں میں بھاری بارشوں کا امکان ہے جبکہ پونچھ، رام بن،ڈوڈہ، کشتواڑ اور جنوبی کشمیر کے کچھ علاقوں میں درمیانی سے شدید بارشیں متوقع ہیں۔

ان کا کہنا ہے کہ 27 سے 30 اگست تک موسم عام طور پر گرم اور مرطوب رہنے کا امکان ہے جبکہ اس دوران کہیں کہیں ہلکی بارش ہوسکتی ہے۔

موصوف ترجمان نے کہا کہ 31 اگست اور یکم ستمبر کو بھی موسم گرم اور مرطوب رہنے کا امکان ہے تاہم اس دوران جموں صوبے میں کہیں کہیں درمیانی درجے سے بھاری بارشیں ہوسکتی ہیں۔

انہوں نے کہا کہ بعد میں 2 سے 5 ستمبر تک کہیں کہیں ہلکی بارشوں کا امکان ہے۔محکمے نے اپنی ایڈوائزری میں کہا ہے کہ جموں کشمیر میں 25 اور 26 اگست کو کہیں کہیں تیز اور انتہائی شدید بارشوں کا امکان ہے۔
انہوں نے کہا کہ اس دوران کہیں کہیں بادل پھٹنے، سیلابی ریلے آنے، لینڈ سلائیڈنگ ہونے اور چٹانیں کھسکنے کے بھی خطرات ہیں۔

لوگوں سے کہا گیا ہے کہ دریائوں، ندی نالوں اور کمزور تعمیراتی ڈھانچوں کے نزدیک جانے سے احتراز کریں۔
ایڈوائزری میں کہا گیا ہے کہ اس دوران جموں صوبے کے کچھ نشیبی علاقوں میں پانی جمع ہوسکتا ہے۔
تمام متعلقین سے الرٹ اور اپ ڈیٹ دہنے کی ہدایت دی گئی ہے۔

یو این آئی

سری نگر،: جنوبی کشمیر کے ضلع شوپیاں کے چھوٹی پورہ علاقے میں پیر کی صبح ایک سڑک حادثے میں چار افراد زخمی ہوگئے۔

ذرائع نے بتایا کہ شوپیاں کے چھوٹی پورہ علاقے میں پیر کی صبح دو موٹر سائیکلوں کے درمیان زور دار ٹکر ہوگئی جس کے نتیجے میں ان پر سوار چار افراد شدید زخمی ہوگئے۔

انہوں نے کہا کہ زخمیوں کو علاج ومعالجے کے لئے ضلع اسپتال شوپیاں منتقل کیا گیا۔زخمیوں کی شناخت مختار احمد چوہان ولد محمد حسین چوہان ساکن سڈیو، ہلال احمد میر ولد محمد لطیف میر ساکن چک چھوٹی پورہ، نثار احمد میر ولد محمد اسلم میر ساکن چھوٹی پور اور سہیل شبیر احمد ولد شبیر احمد بٹ ساکن سڈیو کے طور پر ہوئی ہے۔

دریں اثنا پولیس نے اس سلسلے میں ایک کیس درج کرکے کارروائیاں شروع کی ہیں۔