سری نگر،  جموں و کشمیر کے لیفٹیننٹ گورنر منوج سنہا نے منگل کے روز کولگام تصادم میں جاں بحق ہونے والے دو فوجی جوانوں کو خراج عقیدت پیش کیا۔انہوں نے کہا کہ ان جوانوں کی بہادری اور انمول جذبے کو ہمیشہ یاد رکھا جائے گا۔
واضح رہے کہ کولگام کے گڈر جنگلاتی علاقے میں انکائونٹر کے دوران دو فوجی جوان جاں بحق جبکہ ایک زخمی ہوا تھا۔
فوجی ذرائع نے بتایا کہ اس انکائونٹر کے دوران 2 دہشت گرد بھی ہلاک ہوئے تھے۔جاں بحق فوجی جوانوں کی شناخت صوبیدار پربھات گور اور لانس نائک نریندر سندھو کے طور پر کی گئی تھی۔
ایک سرکاری ترجمان نے بتایا: ‘ لیفٹیننٹ گورنر نے بہادر فوجی جوانوں صوبیدار پربھات گور اور لانس نائیک نریندر سندھو کو خراج تحسین پیش کیا جنہوں نے کولگام میں دہشت گردوں کے خلاف جاری کارروائیوں میں عظیم قربانیاں دیں’۔
منوج سنہا نے کہا: ‘میرے خیالات سوگوار خاندانوں کے ساتھ ہیں۔ قوم اس مشکل گھڑی میں ان کے ساتھ کندھے سے کندھا ملا کر کھڑی ہے’۔
ان کا کہنا تھا کہ ان جوانوں کی قربانیوں کو ہمیشہ یاد رکھا جائے گا۔

سری نگر: پی ڈی پی صدر اور سابق وزیر اعلیٰ محبوبہ مفتی کا دعویٰ ہے کہ مفتی محمد سعید کی قیادت والی حکومت کے دوران ہی جنوبی کشمیر میں اہم ترقیاتی منصوبے مکمل ہوئے اور وہاں ایک یونیورسٹی کیمپس، اسلامک یونیورسٹی آف سائنس اینڈ ٹیکنالوجی اور ایک میڈیکل کالج قائم کیا گیا۔

انہوں نے کہا کہ سب سے نمایاں بات یہ ہے کہ آل انڈیا انسٹی ٹیوٹ آف میڈیکل سائنسز (اے آئی آئی ایم ایس) جنوبی کشمیر کے لیے نہایت کم وقت میں منظور کیا گیا۔

موصوف صدر نے منگل کو ‘ایکس’ پر ایک پوسٹ میں کہا: ‘یہ مفتی محمد سعید کی حکومت کا دور تھا کہ جنوبی کشمیر میں اہم ترقیاتی منصوبے مکمل ہوئے۔ ایک یونیورسٹی کیمپس، اسلامک یونیورسٹی آف سائنس اینڈ ٹیکنالوجی اور ایک میڈیکل کالج قائم کیے گئے۔ سب سے نمایاں بات یہ ہے کہ آل انڈیا انسٹی ٹیوٹ آف میڈیکل سائنسز (اے آئی آئی ایم ایس) جنوبی کشمیر کے لیے نہایت کم وقت میں منظور کیا گیا’۔

انہوں نے کہا: ‘اس کے برعکس، نیشنل کانفرنس جو دہائیوں تک اقتدار میں رہی، اس خطے میں کوئی ایک بھی ایسا منصوبہ نہیں دکھا سکتی جو اس سطح کا ہو’۔ان کا کہنا تھا: ‘مفتی صاحب کی جانب سے اے آئی آئی ایمس کے لیے منتخب کی گئی جگہ پر ان کا اعتراض دراصل جنوبی کشمیر کے لیے ان کی پرانی بے حسی اور لاتعلقی کو ظاہر کرتا ہے’۔

محبوبہ مفتی نے نشینل کانفرنس کو آڑے ہاتھوں لیتے ہوئے کہا: ‘تاریخی طور پر نیشنل کانفرنس کی حکومتوں نے اکثر ایسے علاقے بڑے منصوبوں کے لیے منتخب کیے جو سیلاب کا خطرہ رکھنے والے تھے اور یہ زمینیں عام طور پر ان کے قریبی ساتھیوں کی ملکیت ہوتی تھیں’۔

انہوں نے کہا: ‘ اس سے صاف ظاہر ہوتا ہے کہ ان کی ترجیح عوامی فلاح کے بجائے ذاتی یا سیاسی مفاد تھی۔ اس کے برعکس پی ڈی پی حکومت نے ہمیشہ ایسے مقامات کا انتخاب کیا جو پورے خطے کے مفاد میں ہوں اور جن کا تعلق کسی خاص فرد یا جماعتی وابستگی سے نہ ہو’۔

ان کا یہ ردعمل وزیر اعلیٰ عمر عبداللہ نے کے بیان کہ اونتی پورہ میں آل انڈیا انسٹی ٹیوٹ آف میڈیکل سائنسز (اے آئی آئی ایم ایس) کے قیام کے لیے جگہ کا انتخاب فزیبلٹی کی بنیاد پر کرنے کے بجائے سیاسی مفادات پر کیا گیا تھا، کے ایک روز بعد سامنے آیا۔

سری نگر،: جنوبی کشمیر کے ضلع کولگام کے گڈر جنگلاتی علاقے میں انسداد دہشت گردی آپریشن منگل کو دوسرے روز بھی جاری ہے۔حکام نے بتایا کہ کولگام کے گڈر جنگلاتی علاقے میں رات بھر کے وقفے کے بعد منگل کی صبح انسداد دہشت گردی آپریشن بحال ہوا۔انہوں نے کہا کہ علاقے میں محاصرے کو مزید سخت کر دیا گیا ہے۔

واضح رہے کہ یہ انکائونٹر پیر کی صبح اس وقت شروع ہوا تھا جب تلاشی کارروائیوں کے دوران وہاں چھپے دہشت گردوں نے فوجی اہلکاروں پر فائرنگ کی تھی۔فوجی ذرائع کے مطابق اس انکائونٹر کے دوران 2 دہشت گرد ہلاک جبکہ دو فوجی جوان بھی ہلاک اور ایک زخمی ہوا ہے۔

ذرائع سے معلوم ہوا کہ علاقے میں مزید دہشت گردوں کی موجودگی کے خدشے کے پیش نظر فوج کی اضافی کمک طلب کر لی گئی ہے۔ محاصرہ سخت کر دیا گیا ہے اور جنگلاتی علاقے میں ڈرون اور جدید نگرانی کے آلات کے ذریعے نظر رکھی جا رہی ہے۔ ساتھ ہی پیرا کمانڈوز کو بھی آپریشن میں شامل کیا گیا ہے ۔

پولیس کے ڈائریکٹر جنرل نلین پربھات نے گڈر میں انکاؤنٹر کی جگہ کا دورہ کیا، جہاں انہوں نے فوج کی قیادت میں مشترکہ آپریشن کی تعریف کی۔قابل ذکر ہے کہ یکم اگست 2025 کو بھی کولگام کے اَکھل جنگلاتی علاقے میں سیکورٹی فورسز اور دہشت گردوں کے درمیان گیارہ روز تک انکاؤنٹر جاری رہا جس میں ایک دہشت گرد مارا گیا تھا جبکہ دو فوجی جوان بھی شہید ہوئے تھے۔

اَکھل، گڈر اور دیگر جنگلاتی علاقے کولگام فارسٹ ڈویژن کے تحت آتے ہیں اور اکثر و بیشتر دہشت گرد ان گھنے جنگلات کو اپنی پناہ گاہ کے طور پر استعمال کرتے ہیں۔