سری نگر: منشیات اسمگلنگ کے خلاف کارروائیوں کو جاری رکھتے ہوئے اونتی پورہ پولیس نے ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں کہا کہ پولیس پوسٹ ٹول پلازہ کی ایک ٹیم نے چرسو علاقے میں ایک ناکے کے دوران ایک شخص کو دھر لیا جو وہاں مشکوک حالت میں گھوم رہا تھا۔
انہوں نے کہا کہ تلاشی کے دوران اس کی تحویل سے 48 گرام وزنی چرس کی 4 چھڑیاں، 40 گرام چرس پائوڈر اور 315 گرام بھنگ چورا جیسا مواد بر آمد کیا گیا۔
ملزم کی شناخت غلام محی الدین شاخساز ولد غلام نبی شاخساز ساکن ملہ پورہ گھاٹ چرسو کے طور پر ہوئی ہے۔
پولیس ترجمان نے بتایا کہ اس ضمن میں پولیس اسٹیشن اونتی پورہ میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر 28/2026 درج کیا گیا اور مزید تحقیقات شروع کی گئیں۔
انہوں نے کہا کہ اونتی پورہ پولیس معاشرے سے منشیات کی بیخ کنی کو یقینی بنانے کے لئے پر عزم ہے۔
