سری نگر: جموں و کشمیر میں سردیوں کی شدت کے دوران بجلی کے نرخ بڑھانے کی مجوزہ تجویز نے سیاسی حلقوں میں بحث چھیڑ دی ہے۔ نیشنل کانفرنس نے اس مسئلے پر اپنا واضح اور سخت مؤقف پیش کرتے ہوئے کہا ہے کہ عمر عبداللہ کی قیادت والی حکومت کسی ایسے اقدام کی اجازت نہیں دے گی جو موجودہ حالات میں عوام پر اضافی بوجھ ڈالے۔
نیشنل کانفرنس کے ترجمانِ اعلیٰ تنویر صادق کا کہنا ہے کہ پارٹی اور حکومت نے پہلے ہی 20 فیصد سرچارج کی تجویز پر اپنا واضح مؤقف اختیار کیا ہے۔ اُنہوں نے کہا کہ وادیٔ کشمیر میں شدید سردیوں کے دوران بجلی محض ایک سہولت نہیں بلکہ زندگی کا لازمی تقاضا ہے۔ ایسے موسم میں صبح و شام بجلی کا استعمال بڑھ جاتا ہے، اور گھروں میں حرارت برقرار رکھنے کے لیے بجلی بنیادی ضرورت بن جاتی ہے۔
مسٹر تنویر صادق نے کہا کہ حکومت اس حقیقت سے پوری طرح آگاہ ہے کہ عام کشمیری پہلے ہی مہنگائی، معاشی دباؤ اور سرد موسم کا سامنا کر رہا ہے۔ ایسے وقت میں بجلی کے نرخ بڑھانا عوامی تکالیف میں اضافہ کرے گا، جو کسی صورت قابل قبول نہیں۔ اُن کے مطابق عمر عبداللہ کی حکومت عوام دوست پالیسیوں پر یقین رکھتی ہے اور کوئی بھی تجویز جو غریب یا متوسط طبقے کے لیے نقصان دہ ہو، اسے منظور نہیں کیا جائے گا۔
انہوں نے کہا کہ اس شدید کشمیری سردی میں بجلی کوئی عیاشی نہیں بلکہ ضرورت ہے، اور عمر عبداللہ حکومت ایسے کسی غیر منصفانہ اور بے وقت فیصلے کو آگے بڑھنے نہیں دے گی۔انہوں نے دوٹوک الفاظ میں کہا کہ موجودہ حکومت کسی ایسے اقدام کو نافذ نہیں ہونے دے گی جو لوگوں کے لیے مزید پریشانی کا باعث بنے۔
