سرینگر،: کاؤنٹر انٹیلیجنس کشمیر (سی آئی کے) نے منگل کو جنوب اور وسطی کشمیر کے مختلف علاقوں میں ہم آہنگ سرچ آپریشنز کے ذریعے اپنی سرگرمیوں میں شدت پیدا کر دی۔
کولگام کے بُگام علاقے میں سی آئی کے، سی آر پی ایف اور ایس او جی پر مشتمل مشترکہ ٹیم نے ایک ڈاکٹر کی رہائش گاہ پر تلاشی لی۔ حکام کے مطابق کارروائی ایک مجاز ایگزیکٹیو مجسٹریٹ کی موجودگی میں قانونی تقاضوں کے تحت انجام دی گئی۔ گھر سے دستاویزات، ڈیجیٹل ڈیوائسز اور دیگر الیکٹرانک مواد کی تلاش کی گئی جو جاری تحقیقات سے متعلق ہو سکتا ہے۔ تفتیشی ٹیم کی جانب سے مزید تفصیلات رپورٹ درج ہونے تک موصول نہیں ہو سکیں۔
ادھر، حال ہی میں درج کیے گئے ایک نئے کیس کے سلسلے میں سی آئی کے نے منگل کی صبح سویرے متعدد مقامات پر چھاپے مارے۔ ان کارروائیوں کا دائرہ کئی اضلاع تک بڑھایا گیا، جن میں سری نگر بھی شامل ہے جہاں ٹیموں نے ایس ایم ایچ ایس اسپتال کے بعض حصوں کا معائنہ کیا۔ اسی نوعیت کی کارروائیاں کچھ دیگر نامعلوم مقامات پر بھی کی گئیں جو وسیع تر تفتیش کا حصہ ہیں۔
حکام کا کہنا ہے کہ یہ تمام تلاشی کارروائیاں اُس تحقیقاتی عمل کا حصہ ہیں جس کا مقصد مبینہ ’’ڈاکٹر ماڈیول‘‘ سے متعلق ٹھوس شواہد جمع کرنا ہے۔
سیکورٹی ایجنسیوں نے گزشتہ چند ہفتوں کے دوران وادی بھر میں مربوط کارروائیوں میں اضافہ کیا ہے جو جاری تحقیقات کی کڑی ہیں۔ [کے این ٹی]
