ممبئی،: بالی ووڈ کے مشہور کامیڈی اداکار اور کریکٹر آرٹسٹ گووردھن اسرانی، جنہیں فلمی دنیا میں صرف "اسرانی” کے نام سے پہچانا جاتا تھا آج 84 برس کی عمر میں وفات پا گئے انہوں نے ممبئی کے جوہو علاقے میں واقع آروگیہ ندھی اسپتال میں سہ پہر 3 بجے آخری سانس لی وہ طویل عرصے سے پھیپھڑوں کے عارضے میں مبتلا تھے۔
1941 میں جے پور میں پیدا ہونے والے اسرانی، فلم اینڈ ٹیلی ویژن انسٹی ٹیوٹ آف انڈیا ( ایف ٹی آئی آئی ) پونا کے سابق طالب علم تھے۔ انہوں نے اپنی منفرد اداکاری اور وقت کی حس کے ذریعے مزاحیہ اداکاری کو ایک نئی شناخت دی۔ فلم شولے (1975) میں جیلر کے کردار سے ان کی شہرت عروج پر پہنچی، جہاں ان کی مشہور مکالمہ "ہم انگریزوں کے زمانے کے جیلر ہیں” آج بھی یاد کیا جاتا ہے۔
پانچ دہائیوں پر محیط اپنے فلمی سفر میں انہوں نے چپکے چپکے، رفو چکر، چھوٹی سی بات اور چلا مراری ہیرو بنے جیسی بے شمار ہٹ فلموں میں اداکاری کی۔ ان کی راجیش کھنہ کے ساتھ جوڑی نے 1972 سے 1991 کے درمیان 25 سے زیادہ فلموں میں ناظرین کو محظوظ کیا۔
2000 کی دہائی میں بھی اسرانی نے ہیرا پھیری، بھاگم بھاگ، گرم مسالہ اور دے دنا دان جیسی فلموں میں اپنی مزاحیہ اداکاری سے ناظرین کے دل جیتے۔ انہوں نے چھ فلموں کی ہدایت کاری بھی کی اور آج کی تازہ خبر (1974) اور بالیکا بدھو (1977) کے لیے دو فلم فیئر ایوارڈز حاصل کیے۔
ان کی آخری رسومات آج ممبئی کے سانتا کروز کے شمشان بھومی میں ایک مختصر تقریب میں ادا کی گئیں، جس میں صرف قریبی اہل خانہ اور دوست شریک ہوئے۔ ان کے پسماندگان میں ان کی اہلیہ، اداکارہ منجو اسرانی، ایک بہن اور بھتیجہ شامل ہیں۔
فلم انڈسٹری کے بڑے ناموں اور مداحوں نے ان کے انتقال پر گہرے دکھ کا اظہار کیا ہے۔ ان کی موت نہ صرف ایک عظیم فنکار کا نقصان ہے بلکہ بالی ووڈ کی مزاحیہ کا ایک روشن باب بند ہوگیا۔
