نئی دہلی: بہار میں رائے دہندوں کی شناخت کے لیے کرائے جانے والے اسپیشل انٹینسیو ریویژن (ایس آئی آر) کے معاملے پر اپوزیشن کے زبردست ہنگامے کی وجہ سے لوک سبھا کی کارروائی جمعہ کو دوپہر 2 بجے تک ملتوی کر دی گئی۔
لوک سبھا اسپیکر اوم برلا نے جیسے ہی وقفہ سوالات شروع کیا، اپوزیشن ارکان نعرے لگاتے ہوئے ایوان کے وسط میں آگئے۔ تب مسٹر برلا نے کہا کہ آپ وقفہ سوال نہیں چلانا چاہتے۔ انہوں نے ارکان سے اپیل کی کہ وہ ایوان کے وقار کو برقرار رکھیں۔
مسٹر برلا نے کہاکہ میں مسلسل درخواست کر رہا ہوں، وقفہ سوال ایک اہم ہے۔ انہوں نے کہا کہ وقفہ سوالات کے دوران نعرے بازی اور پلے کارڈز دکھا کر ارکان کے حقوق نہیں چھینے جا سکتے۔ یہ غلط طرز عمل اور غلط رویہ ہے جو مناسب نہیں۔
انہوں نے دراوڑ منیترا کزگم (ڈی ایم کے) لیڈر ٹی آر بالو کا نام لیا اور کہا کہ آپ سینئر رکن ہیں، کیا آپ کو لگتا ہے کہ یہ مناسب ہے۔ آپ پارلیمانی روایات پر عمل کریں۔ جمہوریت کو مضبوط کرنا ہے تو سوالات اٹھانے دیے جائیں تاکہ حکومت کو جوابدہ بنایا جا سکے۔
مسٹر برلا نے کہا کہ لوگوں کی توقعات اور امنگوں کو پورا ہونے دیں اور ملک کی ترقی میں اپنا حصہ ڈالیں۔ ملک میں ہونے والی تبدیلیوں پر بھی بات کریں۔
انہوں نے کہا کہ عوامی اظہار نعرے بازی اور پلے کارڈز دکھانے سے نہیں ہوتا۔ عوام نے ایوان میں اپنے خیالات کے اظہار کا موقع دیا ہے، اسے نعرے بازی میں ضائع نہ کریں۔
اسپیکر کی جانب سے بار بار مطالبہ کرنے کے باوجود ہنگامہ آرائی نہ رکی جس کے باعث ایوان کی کارروائی 2 بجے تک ملتوی کر دی گئی۔
