گاندربل،: جموں و کشمیر پنشنرز یونائیٹڈ فرنٹ کے اراکین نے پیر کو وسطی کشمیر کے ضلع گاندربل میں ایک پرامن احتجاجی مظاہرہ کیا، جس میں انہوں نے اپنے طویل عرصے سے زیر التوا مسائل کے فوری حل کا مطالبہ کیا۔ ان مطالبات میں آٹھویں تنخواہ کمیشن کے تحت مراعات کی بحالی اور میڈیکل الاؤنس میں اضافہ شامل ہے۔
قصبہ میں بزرگ پنشنرز کی بڑی تعداد جمع ہوئی اور حکومت سے اپنے مسائل کے ازالے کے لیے نعرے بلند کیے۔ مظاہرے میں شریک متعدد ریٹائرڈ ملازمین، جنہوں نے تین دہائیوں سے زائد عرصہ حکومت کی خدمت کی، نے کہا کہ ریٹائرمنٹ کے بعد انہیں نظر انداز اور فراموش کر دیا گیا ہے۔
ایک احتجاجی پنشنر نے کہا،”ہم آٹھویں پے کمیشن کے تحت تمام واجب الادا مراعات کی بحالی کا مطالبہ کرتے ہیں۔ حکومت کو چاہیے کہ وہ محض 300 روپے کے معمولی میڈیکل الاؤنس کو کم از کم 1000 روپے تک بڑھائے۔ آج کے دور میں 300 روپے ایک مذاق ہے، یہ نہ تو ڈاکٹر کی بنیادی فیس کا احاطہ کرتا ہے اور نہ ہی علاج یا دوا کا۔”
احتجاج کے دوران ایک اور اہم مطالبہ یہ بھی سامنے آیا کہ 65 سال کی عمر کے بعد ہر پانچ سال پر پنشن میں پانچ فیصد اضافے کو نافذ کیا جائے، جیسا کہ کئی دیگر ریاستوں اور مرکزی حکومت کے اصولوں میں رائج ہے۔ پنشنرز کا کہنا تھا کہ عمر بڑھنے کے ساتھ بیماریوں اور اخراجات میں اضافہ ہوتا ہے، اس لیے یہ اضافہ ناگزیر ہے۔
ایک ریٹائرڈ استاد نے احتجاج میں شامل ہوتے ہوئے کہا،”یہ مطالبات بالکل جائز ہیں۔ ہم کوئی عیش و عشرت نہیں مانگ رہے بلکہ بڑھاپے میں باعزت زندگی کی اپیل کر رہے ہیں۔ جب پوری زندگی عوامی خدمت میں گزار دی، تو کم از کم یہ حق تو بنتا ہے۔”
مظاہرین نے حکومت سے اپیل کی کہ وہ فوری اقدامات کرے اور پنشنرز تنظیم کے ساتھ بات چیت کا آغاز کرے تاکہ ان کے مسائل کو مقررہ وقت میں حل کیا جا سکے۔
احتجاج کے منتظمین میں سے ایک نے خبردار کیا،”اگر ہماری آوازیں یونہی نظر انداز کی جاتی رہیں تو ہمیں مجبوراً ہر ضلع میں احتجاج کو تیز کرنا پڑے گا۔”
کے این ٹی
