نئی دہلی: امریکی سفارت خانہ سے تین زبانوں میں شائع ہونے والے جریدے اسپَین نے اشاعت کی ۶ دہائیاں مکمل کرلی ہیں جریدہ کی مسلسل اور کامیاب اشاعت کے ۶۵ برس مکمل ہونے والے ہیں اسپَین کی اشاعت نومبر ۱۹۶۰ء میں نئی دہلی کے امریکی سفارت خانہ سے شروع ہوئی اس میں امریکہ ہند تعلقات کے علاوہ امریکی تاریخ امریکی ثقافت، امریکی طرز زندگی کے ساتھ امریکی حکومت کی پالیسی، تعلیم ، تجارت ، صحت ، ماحولیات ، تارکین وطن، سائنس اور ٹیکنالوجی، دفاع ، انسانی حقوق، کاروباری پیشہ وری وغیرہ سے متعلق مضامین شامل ہوتے ہیں رسالہ اسپَین کا ایک اور امتیاز یہ ہے کہ دنیا کے کسی اور امریکی سفارت خانہ سے ایسا کوئی رسالہ اس قدر طویل مدت تک شائع نہیں ہوا۔
اردو اور ہندی میں اس کی اشاعت کا آغاز ۲۰۰۳ میں ہوا۔ اور مارچ/اپریل میں دونوں زبانوں میں اسپَین کا پہلا شمارہ منظرِ عام پر آیا۔ اب تک اردو اسپَین نے اپنی اشاعت کے۲۲ برس مکمل کر لیے ہیں۔
اسپَین کا شمار اردو کے عالمی معیار کے رسالوں میں ہوتا ہے۔ اس کی خوبصورتی،مضامین کا تنوع، جدید تقاضوں سے قاری کو ہم آہنگ کرنے کی پیش قدمی اسے قابلِ مطالعہ بناتی ہے۔ یہی سبب ہے کہ اسپَین سے تعارف ہونے کے بعد کوئی اسپَین سے دور نہیں رہ سکتا۔ قاری اسے پڑھنا چاہتے ہیں، اسے خریدنا چاہتے ہیں اور اس کی کاپیوں کو محفوظ رکھنا چاہتے ہیں۔اسپَین کو جو چیزیں دوسرے جریدوں سے ممتاز کرتی ہیں ان میں اس کے مضامین کے ترجموں کا اعلیٰ معیار بھی ایک چیز ہے۔
اسپَین موضوعات کے انتخاب، مضامین اور تصاویر کی پیشکش اور نادر عنوانات پر اردو زبان میں مواد کی فراہمی کا ایک معیاری ذریعہ ہے۔ جدید تقاضوں کا خیال رکھتے ہوئے اسے ای میل پر مفت دستیاب کروایا جارہا ہے۔ اسپَین کے مضامین کو اس کی ویب سائٹ پر بھی پڑھا جا سکتا ہے جہاں اسپَین کے تمام شمارے تینوں زبانوں انگریزی، اردو اور ہندی میں دستیاب ہیں۔ اسپَین کی نئی ویب سائٹ لانچ کرنے کا کام شروع کردیا گیا ہے۔ امید ہے کہ اسپَین کی نئی ویب سائٹ کا اجرا آئندہ ماہ عمل میں آئے گا۔
اسپَین کو اردو قارئین کے لیے دلچسپ بنانے پر غوروخوذ جاری رہتا ہے۔ اس سلسلے میں قاری سے گفت وشنید اور قارئین کے دائرہ کار میں اضافے کے لیے رسالہ کا ادارہ جاتی عملہ ملک میں جابجا منعقد ہونے والے معیاری پروگراموں میں بھی شرکت کرتا رہتا ہے تاکہ قارئین اور مداحوں کو ادارتی عملہ سے دوبدو ملاقات کا موقع میسر آئے اور ان کی آرا سے واقفیت بھی ہو۔
اسی کوشش کے تحت دہلی اردو اکادمی کی جانب سے کناٹ پلیس میں جشنِ اردو میں بھی اسپَین کا اسٹال لگایا گیا ہے جہاں سینٹرل پارک میں جشنِ اردو کے لیے آنے والے خواتین و حضرات اسٹال کی سجاوٹ اور رسالہ کی ورق گردانی کے لیے لگاتار آرہے ہیں۔ اسپَین کے اسٹال پر جو چیزیں عوام کی توجہ کا سبب ہیں ان میں اسپَین کے برقی رسالہ کے مفت سبسکرپشن کے علاوہ ، اسپَین کے ادارتی عملہ سے گفت و شنید ، قریب میں واقع امیریکن سینٹر میں طلبہ اور مہمانوں کے لیے دستیاب سہولتوں کے بارے میں معلومات کی فراہمی، امیریکن سینٹر میں ایجوکیشن یو ایس اے اور امریکہ ۔ہند تعلیمی فاؤنڈیشن کے کاؤنسلنگ سیشن کے ذریعہ امریکہ میں موجود تعلیمی مواقع کی جانکاری، اسپَین میگزین کی مطبوعہ کاپی کی تعلیمی اداروں کو مفت فراہمی، اسٹال میں چرخی چلا کر انعام جیتنے کا موقع ، امیریکن سینٹر لائبریری کی ایک سال کے لیے مفت رکنیت کا حصول، امیریکن سینٹر کے پروگراموں سے واقفیت کے لیے ماہانہ بلیٹن کی دستیابی اور امیریکن سینٹر لائبریری کے برقی وسائل سے استفادہ کرنے سے متعلق جانکاری ہیں۔
