نیشنل کانفرنس حکومت تشکیل دینے کی خاطر بی جے پی کے ساتھ ہاتھ ملا سکتی ہے :بی جے پی لیڈر دویندر رانا

جموں:سینئر بی جے پی لیڈر دویندر سنگھ رانا نے منگل کے روز دعویٰ کیا کہ نیشنل کانفرنس سال 2014میں بی جے پی کے ساتھ الائنس کرنے کے لیے کشکول لے کر دلی گئی تھی لیکن وزیر داخلہ امیت شاہ سمیت پارٹی کے لیڈروں نے ان کو واپس بھیجا تھا۔انہوں نے کہاکہ میں حیران ہوں کہ عمر عبداللہ دعویٰ کر رہے ہیں کہ رام مادھو کا پی ڈی پی کے ساتھ ربط ہے ۔
ان باتوں کا اظہار موصوف نے جموں میں ایک پرہجوم پریس کانفرنس کے دوران کیا۔
انہوں نے کہاکہ سال 2014میں نیشنل کانفرنس نے بی جے پی کے ساتھ حکومت تشکیل دینے کی خاطر این سی وفد کو نئی دہلی بھیجا لیکن وزیر داخلہ امیت شاہ اور دوسرے لیڈران نے نیشنل کانفرنس کی پیشکش کو ٹھکرا دیا۔
دویندر رانا نے کہا :’نیشنل کانفرنس نے بھارتیہ جنتاپارٹی کے لیڈر کو وزارت اعلیٰ کی کرسی پر بٹھانے پر بھی اپنی رضا مندی ظاہر کی تھی لیکن بی جے پی کی مرکزی قیادت نے اُس وقت پی ڈی پی کے ساتھ ہاتھ ملانے کو ترجیح دی ۔‘
ان کا مزید کہنا تھا کہ نیشنل کانفرنس کے پاس اس وقت صرف 15ممبران اسمبلی تھے اور وہ کسی بھی صورت میں بی جے پی کے ساتھ حکومت تشکیل دینے کیلئے پر تول رہے تھے۔
دویندر سنگھ نے سنسنی خیز انکشاف کرتے ہوئے کہاکہ میں اُس لیڈر کو بھی جانتا ہوں جسے وزیر اعلیٰ بنایا جانا تھا ۔
رانا نے نیشنل کانفرنس کو ہدفہ تنقیدبناتے ہوئے کہا کہ این سی کشمیر عوام کو دھوکہ دے رہی ہیں ۔
انہوں نے کہاکہ نیشنل کانفرنس کا دعویٰ ہے کہ شنکراچاریہ کا نام تبدیل کیا جائے گا تاہم میں یہ واضح کرنا چاہتا ہوں کہ جب تک جموں وکشمیر میں بی جے پی موجود ہے دنیا کی کوئی طاقت اس پہاڑی کا نام بدل نہیں سکتی ۔
بی جے پی کے سینئر لیڈر نے کہا :’سال 2008اور 2010کی ایجی ٹیشن میں ملوث سنگبازوں کو نیشنل کانفرنس جیلوں سے آزاد کرانا چاہتی ہے۔
ان کا مزید کہنا ہے کہ عمر عبداللہ کی جانب سے بھاجپا پر تنقید کرنا ناقابل فہم ہے کیونکہ وہ بی جے پی کی سیاسی گود میں پلے بڑھے ہیں۔
انہوں نے مزید بتایا کہ مجھے پورا یقین ہے کہ نیشنل کانفرنس کانگریس کے ساتھ اتحاد کو ختم کرکے آج بھی بی جے پی کے ساتھ حکومت تشکیل دینے کی خاطر ہاتھ ملا سکتی ہے۔
انہوں نے کہاکہ جموں وکشمیر کے لوگوں کو اس بات کی پوری علمیت ہے کہ ڈاکٹر فاروق عبداللہ اپنے مزاج کے بدلاو کے لئے جانتے ہیں۔
ان کے مطابق فاروق عبداللہ جو صبح کہتے ہیں شام تک اس بیان پر قائم رہنا ان کے شیان شان نہیں۔