سری نگر، 8 مارچ: وادی کشمیر کے معروف معالج اور خیبر ہسپتال کے میڈیکل سپر انٹنڈنٹ ڈاکٹر شوکت شاہ نے طلبا کو اپنی تمام تر توجہ تعلیم کی طرف مرکوز کرنے کی تاکید کرتے ہوئے کہا کہ ہمیں کورونا کی ممکنہ چوتھی لہر کی پیش گوئیوں سے گھبرانے کی کوئی ضرورت نہیں ہے۔

انہوں نے کہا کہ بچوں کو اسکولوں میں تعلیم کی طرف بھر پور توجہ مرکوز کرنی چاہئے تاہم حکام کی طرف سے جاری کورونا گائیڈ لائنز پر من و عن عمل کرنے کی ضرورت ہے۔

موصوف ڈاکٹر نے ایک سوال کے جواب میں کہا: ’ہمیں کورونا کی ممکنہ چوتھی لہر کی پیش گوئیوں سے گھبرانے کی کوئی ضرورت نہیں ہے، دیکھتے ہیں کہ یہ لہر آتی بھی ہے یا نہیں اگر آئے گی تو ہم اس کا مردانہ وار مقابلہ کرنے کے لئے تیار ہیں‘۔ ان کا کہنا تھا: ’ہماری قوم ایک بہادر قوم ہے ہم نے جس طرح گذشتہ لہروں کا ڈٹ کر مقابلہ کیا اسی طرح اس ممکنہ لہر کا بھی مقابلہ کریں گے‘۔

ڈاکٹر شوکت شاہ نے کہا کہ بچوں کو اسکولوں میں اپنی تعلیم کی طرف بھر پور توجہ مرکوز کرنی چاہئے۔انہوں نے کہا: ‘ایک قوم کی کلہم تعمیر و ترقی کا انحصار تعلیم پر ہوتا ہے زائد از دو برسوں کے بعد تعلیمی ادارے کھل رہے ہیں لہذا ہمارے بچوں کو اسکولوں میں اپنی تعلیم کی طرف بھر پور توجہ مرکوز کرنی چاہئے‘۔

موصوف میڈکل سپرانٹنڈنٹ نے کہا کہ ہم نے اس وبا کے خلاف جنگ میں لگ بھگ کامیابی حاصل کی ہے لیکن کورونا گائیڈ لائنز پر من و عن عمل کرنے کی سخت ضرورت ہے۔
انہوں نے کہا کہ اسکولوں، مساجد، بازاروں اور دیگر جگہوں پر کورونا گائیڈ لائنز پر ہر حال میں عمل در آمد ضروری ہے۔

قابل ذکر ہے کہ وادی میں کورونا کے کیسز میں کمی واقع ہونے ساتھ ہی زائد از ڈیڑھ برسوں کی طویل مدت کے بعد ماہ رواں کی دو تاریخ سے تعلیمی اداروں میں درس و تدریس کا عمل بحال ہوا جس سے والدین،بچے اور اساتذہ خوشی پھولے نہیں سما رہے ہیں۔

یو این آئی