ایگزٹ پولز وزیر اعظم نریندر مودی کی مسلسل دوسری جیت کی طرف اشارہ کر رہے ہیں، لیکن حزب اختلاف اپنی جیت کے حوالے سے پر امید ہے۔

دنیا کے سب سے بڑے اور مہنگے انتخابات 11 اپریل سے 19 مئی تک جاری رہے اور سات مرحلوں میں تقریباً 60 کروڑ بھارتیوں نے ووٹ ڈالے جن کی گنتی ایک دن میں مکمل ہونے کے بعد نتائج کا اعلان کیا جائے گا۔

اگر نتائج میں کوئی واضح ٹرینڈ ہوا تو وہ مقامی وقت کے مطابق دوپہر 12 بجے تک نظر آجائے گا لیکن اگر نتائج میں بھارتیہ جنتا پارٹی اور کانگریس قریب قریب رہے تو پھر 1.3 ارب بھارتیوں کو حتمی نتائج کے لیے زیادہ دیر تک انتظار کرنا پڑے گا۔

مودی اور ان کی ہندو قوم پرست بھارتیہ جنتا پارٹی 2014 میں پارلیمنٹ کی 545 میں سے 282 نشستیں جیت کراقتدار میں آئی تھی۔ یہ 30 سال میں پہلی مرتبہ تھا کہ کسی ایک پارٹی کو اتنی اکثریت ملی ہو۔

کانگریس پارٹی کے 48 سالہ امیدوار راہول گاندھی نے بدھ کو ایگزٹ پولز کے اندازوں کو رد کرتے ہوئے ایک ٹوئٹ میں اپنے حامیوں سے کہا: ’جعلی ایگزٹ پولز کے پروپیگنڈا سے ناامید نہ ہوں۔‘

بھارتی ایگزٹ پولز اکثر نا قابلِ اعتبار ہوتے ہیں۔ 2004 میں ایگزٹ پولز بی جے پی کی جیت کی طرف اشارہ کر رہے تھے، مگر نتائج اس کے برعکس نکلے اور کانگریس اقتدار میں آئی۔

ان انتخابات میں کچھ ریاستوں کے نتائج بہت اہمیت رکھتے ہیں جیسے مغربی بنگال اور اتر پردیش، جو بھارت کی سب سے زیادہ آبادی والی ریاست ہے اور 2014 میں نریندر مودی کی بڑی بیس تھی۔