پہلگام، 11 ستمبر : شمالی کمانڈ کے جنرل آفیسر کمانڈنگ اِن چیف، لیفٹیننٹ جنرل پرتیک شرما نے جمعہ کے روز کہا کہ فوج جموں و کشمیر میں امن و سکون کو یقینی بنانے کے ساتھ ساتھ قوم کی تعمیر کے لیے اپنی خدمات جاری رکھے گی۔
پہلگام میں آرمی گُڈ وِل اسکول (اے جی ایس) میں منعقدہ ایک تقریب سے خطاب کرتے ہوئے لیفٹیننٹ جنرل شرما نے کہا، "جب ہم وِکسِت بھارت (ترقی یافتہ بھارت) کی جانب آگے بڑھ رہے ہیں، شمالی کمانڈ امن و سکون کو یقینی بناتے ہوئے قوم کی تعمیر کے لیے اپنی وابستگی جاری رکھے گی۔”
انہوں نے کہا کہ یہ عزم جموں و کشمیر کے عوام کے لیے ہے اور مزید کہا، "آپ کا امن ہمارا مقصد ہے، آپ کی امنگیں ہمارے مشن ہیں اور آپ کی کامیابی ہمارا فخر ہے۔”
فوجی کمانڈر نے طلبہ کی کامیابیوں کو بھی سراہا اور ان کی کامیابی کا سہرا ان کے والدین کی رہنمائی اور اساتذہ کی جانب سے فراہم کی جانے والی معیاری تعلیم کو دیا۔
انہوں نے بتایا کہ اے جی ایس وُزُر نے ینگ سائنٹسٹ انڈیا 2025 میں قومی سطح پر تیسری پوزیشن حاصل کی، جبکہ اے جی ایس اُوڑی نے چھٹی پوزیشن حاصل کی۔ اسی طرح اے جی ایس وُزُر نے حال ہی میں انوویشن (اختراع) کے زمرے میں ملک کے سرفہرست 10 اسکولوں میں جگہ بنائی ہے۔—(کے این او)
