سری نگر، : جموں و کشمیر میں کنٹریکچول اور یومیہ اجرت پر کام کرنے والے سینکڑوں ملازمین نے اپنے اہلِ خانہ اور بچوں کے ہمراہ جمعرات کو شیرِ کشمیر پارک پولو ویو سرینگر میں دھرنا دیا۔ یہ احتجاج ایمپلائز جوائنٹ ایکشن کمیٹی (ای جے اے سی) کے بینر تلے ملازمین کی مستقلی کے مطالبے کے حق میں منعقد کیا گیا۔
ای جے اے سی کے جنرل سیکریٹری سجاد احمد پرے نے دھرنے سے خطاب کرتے ہوئے کہا کہ بچوں کی شرکت اس بات کی غماز ہے کہ یہ جدوجہد صرف ملازمین تک محدود نہیں بلکہ ان کے خاندانوں، بالخصوص نئی نسل کی تعلیم اور مستقبل پر بھی اثر انداز ہو رہی ہے۔
انہوں نے نامہ نگاروں سے گفتگو میں کہا، “یہ جدوجہد اُس وقت تک جاری رہے گی جب تک ہر عارضی ملازم کو انصاف نہیں مل جاتا۔” انہوں نے حکومت سے مطالبہ کیا کہ چیف سیکریٹری کی سربراہی میں قائم کمیٹی کی مستقلی سے متعلق رپورٹ اسمبلی میں پیش کیے جانے سے قبل ای جے اے سی کے تحفظات دور کیے جائیں۔
دھرنے میں شریک بچوں اور اہلِ خانہ نے بھی نعرے بازی کی اور کہا کہ مستقلی میں تاخیر کے باعث ان کے روزگار اور گزر بسر کے ذرائع متاثر ہو رہے ہیں۔
قابلِ ذکر ہے کہ سجاد احمد پرے نے گزشتہ روز وزیرِ اعظم سے ذاتی مداخلت کی اپیل کرتے ہوئے سیاسی جماعتوں اور عوامی نمائندوں سے اس مسئلے کو سماجی ذمہ داری کے طور پر تسلیم کرنے کا مطالبہ کیا تھا۔ ان کا کہنا تھا، “ہم اپنے کارکنوں کے لیے انصاف اور وقار چاہتے ہیں، محاذ آرائی نہیں۔” —
