نئی دہلی: وزیر اعظم نریندر مودی پیر کے روز تین ممالک اردن، ایتھوپیا اور عمان کے چار روزہ دورے پر اردن کے لیے روانہ ہو گئے۔
دورے کے پہلے مرحلے کے لیے روانہ ہونے سے قبل اپنے بیان میں وزیر اعظم نے کہا کہ تینوں ممالک کے ساتھ ہندوستان کے قدیم تہذیبی تعلقات کے ساتھ ساتھ جامع عصری دوطرفہ تعلقات بھی ہیں۔وزیر اعظم نے کہا کہ سب سے پہلے وہ شاہ عبداللہ دوم ابن الحسین کی دعوت پر اردن جائیں گے۔
انہوں نے کہا کہ یہ تاریخی دورہ دونوں ممالک کے درمیان سفارتی تعلقات کے قیام کے 75 برس مکمل ہونے کی علامت ہوگا۔
مسٹر مودی شاہ عبداللہ دوم ابن الحسین اور اردن کے وزیر اعظم جعفر حسن کے ساتھ تفصیلی بات چیت کریں گے اور ان کی ولی عہد شہزادہ الحسین بن عبداللہ دوم سے بھی ملاقات متوقع ہے۔ مسٹر مودی اردن میں مقیم ہندوستانی برادری کے افراد سے بھی ملاقات کریں گے۔ انہوں نے کہا کہ’’میں متحرک ہندوستانی برادری سے بھی ملاقات کروں گا، جنہوں نے ہند-اردن تعلقات میں اہم رول ادا کیا ہے۔”
مسٹر مودی اردن سے ایتھوپیا کے اپنے پہلے دورے پر روانہ ہوں گے۔ وہ ایتھوپیا کے وزیر اعظم کی دعوت پر وہاں جا رہے ہیں۔ ایتھوپیا کا دارالحکومت ادیس ابابا افریقی یونین کا ہیڈکوارٹر بھی ہے۔ سال 2023 میں ہندوستان کی جی-20 صدارت کے دوران افریقی یونین کو جی-20 کا مستقل رکن شامل کیا گیا تھا۔ ادیس ابابا میں وہ وزیر اعظم ڈاکٹر ابی احمد علی کے ساتھ تفصیلی بات چیت کریں گے اور وہاں مقیم ہندوستانی تارکین وطن سے ملاقات کریں گے۔
مسٹر مودی ایتھوپیا کی پارلیمنٹ کے مشترکہ اجلاس سے بھی خطاب کریں گے۔ انہوں نے کہا کہ ’’مجھے ایتھوپیا کی پارلیمنٹ کے مشترکہ اجلاس سے خطاب کا بھی اعزاز حاصل ہوگا، جہاں میں ‘لوک تنتر کی جننی‘ کے طور پر ہندوستان کے سفر اور ہند-ایتھوپیا شراکت داری عالمی جنوبی ممالک (گلوبل ساؤتھ) کے لیے کیا قدر و قیمت لا سکتی ہے، اس پر اپنے خیالات کا اظہار کرنے کے لیے پرجوش ہوں۔”
دورے کے آخری مرحلے میں مسٹر مودی عمان جائیں گے۔ ان کا یہ دورہ دونوں ممالک کے درمیان سیاسی تعلقات کے قیام کے 70 برس مکمل ہونے کی علامت ہوگا۔ وہ عمان کے سلطان کے ساتھ اسٹریٹجک اور اقتصادی شراکت داری کو مضبوط بنانے کے اقدامات پر تبادلۂ خیال کریں گے۔ انہوں نے کہا کہ ’’مسقط میں میں عمان کے سلطان کے ساتھ اپنی بات چیت اور ہماری اسٹریٹجک شراکت داری کے ساتھ ساتھ ہمارے مضبوط تجارتی اور اقتصادی تعلقات کو مزید مستحکم کرنے کی امید رکھتا ہوں۔”
وہ عمان میں ایک اجتماع کے دوران ہندوستانی برادری سے بھی خطاب کریں گے۔ مسٹر مودی نے کہا کہ ’’میں عمان میں ہندوستانی تارکین وطن کے ایک اجتماع سے بھی خطاب کروں گا، جنہوں نے ملک کی ترقی اور ہماری شراکت داری کو آگے بڑھانے میں نہایت اہم رول ادا کیا ہے۔‘‘
