سری نگر،: وسطی کشمیر کے ضلع گاندربل میں پولیس نے ایک نوعمر لڑکی کو اپنی چھوٹی بہن کے مبینہ قتل کے الزام میں گرفتار کیا ہے۔
واضح رہے کہ گاندربل کے سہ پورہ علاقے میں اتوار کی صبح ایک کمسن بچی کی لاش بر آمد ہوئی تھی جس سے پورے علاقے میں سنسی کا ماحول پیدا گیا تھا اور علاقے کے لوگوں نے اس دل دہلا دینے والے واقعے کے خلاف احتجاج درج کیا تھا۔
پولیس نے اس ضمن میں ایک خصوصی تحقیقاتی ٹیم (ایس آئی ٹی) تشکیل دے کر بھارتیہ نیائے سنہتا (بی این ایس) کی دفعہ 103 کے تحت ایک مقدمہ درج کیا۔
حکام نے بتایا کہ فارنسک ٹیموں نے جائے وقوعہ سے نمونے بھی اکٹھے کئے۔مقامی لوگوں نے بتایا کہ مقتولہ کو قتل سے کچھ دیر قبل آخری بار اپنی بڑی بہن کے ساتھ دیکھا گیا تھا۔
اس معاملے کی تفتیش سے وابستہ ایک اہلکار نے بتایا: ‘پوچھ گچھ کے دوران بڑی بہن نے جھگڑے کے بعد اپنی چھوٹی بہن کو ڈنڈے سے مارنے کا اعتراف کیا’۔
انہوں نے کہا: ‘ گھر سے نکلتے وقت دونوں بہنوں میں جھگڑا ہوا، اس دوران بڑی بہن نے اپنی چھوٹی بہن پر ڈنڈے سے وار کیا جس سے اس کی موت ہوگئی’۔
ان کا مزید کہنا تھا: ‘اس کیس کے سلسلے میں ہم نے بڑی بہن کو گرفتار کیا ہے’۔
یو این آئی
