دہرادون،: اتراکھنڈ کے آفت زدہ دھرالی گاؤں میں پھنسے ہوئے اور لاپتہ لوگوں کو بچانے کے لیے جمعرات کو موسم صاف ہونے کے بعد جنگی بنیادوں پر کام شروع ہوا۔
بلاک شدہ سڑکوں کو کھولنے کے لئے فوج اور نیم فوجی دستوں نے چین کی سرحد کے قریب ایک اور راستے سے دھرالی پہنچنا شروع کر دیا ہے ۔ اب تک مقامی لوگوں کے علاوہ فوج کے ایک حولدار، اگنی ویروں، کیرالہ کے 28 سیاحوں کے گروپ سمیت متعدد لوگ لاپتہ ہیں۔ لاپتہ افراد کی تعداد ابھی تک واضح نہیں ہے۔
فوج، آئی ٹی بی پی، این ڈی آر ایف اور ایس ڈی آر ایف کی ٹیمیں تلاش اور بچاؤ کاموں میں مسلسل مصروف ہیں۔ اب تک 233 افراد کو بحفاظت بچا یا گیا ہے۔ ان میں سے آج صبح 9 بجے تک 43 افراد کو جبکہ بدھ کو 60 اور منگل کو 130 افراد کو محفوظ نکالا جاچکا ہے،وہیں تین دنوں میں کل چھ لاشیں برآمد ہوئی ہیں۔
آج بچائے گئے لوگوں میں جلگاؤں (مہاراشٹرا) کے عقیدت مندوں کا ایک گروپ بھی شامل ہے۔ ان کے بارے میں جلگاؤں کلکٹر آیوش پرساد نے بدھ کو کہا تھا کہ ضلع سے 19 لوگوں کے اترکاشی میں ہونے کی اطلاع ملی ہے، جن میں سے تین لوگوں سے رابطہ کیا گیا ہے لیکن 16 لوگوں سے ابھی تک رابطہ نہیں ہو پایا ہے۔ اطلاع ہے کہ ان سبھی کو آج فوج، این ڈی آر ایف اور ایس ڈی آر ایف نے ریسکیو کرلیا ہے۔ سبھی نے ریسکیو ٹیم اور ریاستی حکومت کا شکریہ ادا کیا ہے۔
دھرالی گاؤں میں پیش آئی آفت میں لاپتہ افراد کی تعداد کے بارے میں ابھی تک صورتحال واضح نہیں ہے۔ بھٹواڑی اور مکھبہ گاؤں کے مقامی لوگوں کے مطابق مکھوا، بھٹواڑی اور آس پاس کے گاؤں کے لوگ دھرالی گاؤں میں ہاردودھو میلے میں گئے تھے۔ ان سے رابطہ نہیں ہوپا رہا ہے۔
تباہی کی وجہ سے دھرالی گاؤں میں بجلی کی سپلائی کے ساتھ کنکٹی ویٹی بھی نہیں ہے جس کی وجہ سے رابطہ میں دقت پیش آرہی ہے۔ ہرشل اور نتالا کی طرف جانے والا راستہ بھی دونوں طرف سے بند ہے، اسے کھولنے کی کوششیں جاری ہیں۔ فضائیہ کی مدد سے پوک لینڈ مشینوں کو ایئر لفٹ کیا جا رہا ہے۔ بارڈر روڈ آرگنائزیشن کے جوان دن رات ان سڑکوں کو صاف کرنے میں مصروف ہیں۔
یو این آئی
