غزہ، : غزہ پٹی کے مختلف علاقوں میں اسرائیلی حملوں میں کم از کم 19 فلسطینی ہلاک ہو گئے۔ یہ اطلاع غزہ سول ڈیفنس نے دی۔
شہری دفاع کے ترجمان محمود باسل نے بدھ کو ژنہوا کو بتایا کہ غزہ شہر کے شمال مشرق میں الطفاح میں حسونہ خاندان کے گھر کو نشانہ بنانے والے اسرائیلی فضائی حملے میں بچوں اور خواتین سمیت 10 افراد ہلاک ہو ئے۔
غزہ پٹی کے شمال میں جبالیہ کے علاقے میں اسرائیلی فوج نے تین افراد کو ہلاک اور دیگر کو زخمی کر دیا۔ غزہ پٹی کے جنوبی علاقے خان یونس میں اسرائیلی ڈرون حملوں میں دو بچوں سمیت کم از کم پانچ افراد ہلاک ہو ئے۔ باسل نے کہا کہ ایک اسرائیلی طیارے نے وسطی شہر نصیرات میں بے گھر لوگوں میں خوراک تقسیم کرنے والے ایک خیمے کو نشانہ بنایا جس میں ایک فلسطینی ہلاک ہوا۔
فلسطینی سیکیورٹی ذرائع نے بتایا کہ بدھ کی صبح سے غزہ سٹی کے مشرقی علاقوں، بیت حنون اور شمالی غزہ پٹی کے بیت لاحیہ علاقوں پر اسرائیلی توپ خانے کی گولہ باری جاری ہے۔
اس دوران حماس کے مسلح ونگ القسام بریگیڈز نے ایک بیان میں کہا ہے کہ اس کے ارکان نے غزہ شہر کے مشرق میں واقع الوفا اسپتال کے قریب تین اسرائیلی مرکوا 4 ٹینکوں کو نشانہ بنایا۔ اسرائیلی فوج نے ابھی تک ان حملوں پر کوئی تبصرہ نہیں کیا ہے۔
اسرائیل ڈیفنس فورسز (آئی ڈی ایف) نے بدھ کو ایک بیان میں کہا کہ غزہ پٹی میں 18 مارچ سے شروع ہونے والی نئی کارروائی میں حماس کے سیاسی بیورو کے کل 11 اعلیٰ عہدیدار ہلاک ہو چکے ہیں۔
اس میں کہا گیا ہے کہ ’’نئی مہم کے تحت اب تک، اسرائیلی فضائیہ کے 350 لڑاکا طیاروں کے فضائی حملوں میں دہشت گرد وں کے تقریباً 1200 ٹھکانوں کو نشانہ بنایا گیا ہے۔ 100 سے زیادہ نشانہ بنائے گئے مقامات کو تباہ کر دیا گیا ہے اور غزہ پٹی میں دہشت گرد تنظیموں کے سینکڑوں عسکریت پسند اور فوجی کمانڈر مارے جا چکے ہیں۔‘‘
غزہ میں صحت کے افسران نے بدھ کو اعلان کیا کہ گزشتہ 24 گھنٹوں کے دوران غزہ میں کم از کم 25 افراد ہلاک اور 89 دیگر زخمی ہوئے۔
تازہ ترین اعداد و شمار کے مطابق اسرائیل کی جانب سے غزہ پر دوبارہ جارحیت شروع کرنے کے بعد سے ہلاکتوں کی تعداد 1,652 ہو گئی ہے اور اکتوبر 2023 میں جنگ شروع ہونے کے بعد سے اب تک ہلاکتوں کی مجموعی تعداد 51,025 ہو گئی ہے۔
یو این آئی
