بانڈی پورہ میں فوجی گاڑی حادثے کی شکار، 2جوان جاں بحق، تین دیگر زخمی

سری نگر: شمالی ضلع بانڈی پورہ میں ہفتے کے روز فوجی گاڑی کو حادثہ پیش آیا جس کے نتیجے میں دو اہلکار ہلاک جبکہ تین دیگر زخمی ہوئے ہیں۔
اطلاعات کے مطابق بانڈی پورہ کے ایس کے پائین علاقے میں اس وقت سراسیمگی دوڑ گئی جب فوجی گاڑی ڈرائیور کے قابو سے باہر ہو کر گہری کھائی میں جاگری ۔
معلوم ہوا ہے کہ حادثے کی اطلاع ملتے ہی مقامی لوگ جائے موقع پر پہنچے اور زخمی اہلکاروں کو نزدیکی ہسپتال منتقل کیا تاہم ڈاکٹروں نے دو جوانوں کو مردہ قرار دیا۔
ذرائع نے بتایا کہ بانڈی پورہ ہسپتال میں ابتدائی مرہم پٹی کے بعد حادثے میں زخمی ہوئے مزید تین فوجی جوانوں کو سری نگر منتقل کیا گیا ہے۔
ذرائع کا کہنا ہے کہ زخمی اہلکاروں کی بھی حالت نازک بنی ہوئی ہے۔
دریں اثنا پولیس نے حادثے کی وجوہات جاننے کی خاطر کیس درج کرکے تحقیقات شروع کی ہے۔