سرینگر: مرکزی وزیر داخلہ امیت شاہ نے ہفتے کے روز کہا کہ دفعہ 370 کی منسوخی کے نتیجے میں کشمیر ملک کے باقی حصوں کے ساتھ مکمل طور پر ضم ہوگیا اور اسے وزیر اعظم نریندر مودی کی حکومت کی اہم کامیابیوں میں سے ایک قرار دیا۔
نئی دہلی میں سردار ولبھ بھائی پٹیل کے یومِ پیدائش کے موقع پر منائے جانے والے قومی یومِ اتحاد (راشٹریہ ایکتا دیوس) کے سلسلے میں ’رن فار یونٹی‘ کو جھنڈی دکھانے سے قبل ایک اجتماع سے خطاب کرتے ہوئے امیت شاہ نے کہا کہ وزیر اعظم نریندر مودی کے دورِ حکومت میں کئی اہم فیصلے لیے گئے، جن میں آرٹیکل 370 کی منسوخی، نکسل ازم کا خاتمہ اور ’ایک ملک، ایک ٹیکس‘ نظام کا نفاذ شامل ہیں۔
انہوں نے کہا، ’’جب ہم بھارت کو منشیات سے پاک بنانے میں کامیاب ہوں گے تو یہ ملک کے نوجوانوں اور اس کے مستقبل کے لیے ان تمام اقدامات میں سب سے بڑی کامیابی ہوگی۔‘‘
امیت شاہ نے بھارت کو مکمل طور پر منشیات سے پاک بنانے کے لیے 31 دسمبر 2029 کی آخری تاریخ مقرر کرتے ہوئے کہا کہ ’وکست بھارت‘ (ترقی یافتہ بھارت) کا خواب ’نشہ مکت بھارت‘ (منشیات سے پاک بھارت) کی تشکیل سے شروع ہوتا ہے۔
انہوں نے کہا کہ بھارت کا لسانی، ثقافتی، روایتی اور مذہبی تنوع اس کی طاقت ہے اور یہ سردار ولبھ بھائی پٹیل سے وابستہ قومی یکجہتی کے پیغام کی عکاسی کرتا ہے۔
نکسل ازم کے خلاف حکومت کی کارروائیوں کا حوالہ دیتے ہوئے امیت شاہ نے کہا کہ بھارت رواں سال 31 مارچ کو نکسل ازم کے سائے سے باہر نکل چکا ہے اور اب ایک منشیات سے پاک ملک بننے کی جانب گامزن ہے۔
انہوں نے کہا کہ ملک کے نوجوانوں کو منشیات کی لعنت سے محفوظ رکھنے اور ایک مضبوط و خوشحال بھارت کی تعمیر کے لیے اجتماعی کوششوں کی ضرورت ہے۔
کے این او
