نئی دہلی : سنجے ملہوترا کو ریزرو بینک آف انڈیا (آر بی آئی) کا نیا گورنر مقرر کیا گیا ہے۔ مرکزی کابینہ نے سنجے ملہوترا کی تقرری کو منظوری دے دی ہے۔ سنجے ملہوترا اپنی بہترین قائدانہ صلاحیتوں اور مالی معاملات کی گہری سمجھ کے لیے جانے جاتے ہیں۔ سنجے 1990 کے آئی اے ایس بیچ کے افسر ہیں جو فی الحال ریونیو سکریٹری ہیں۔ ان کی تقرری 3 سال کے لیے ہوگی۔ کل منگل کو موجودہ گورنر شکتی کانت داس کی مدت کار ختم ہو رہی ہے۔
ڈی پی او ٹی کے ذریعہ 9 دسمبر کو جاری نوٹیفکیشن کے مطابق ریونیو سکریٹری سنجے ملہوترا تین سال کی مدت کے لیے آر بی آئی کے اگلے گورنر ہوں گے۔ سنجے ملہوترا 11 دسمبر کو RBI کے موجودہ گورنر شکتی کانت داس کی جگہ عہدہ سنبھالیں گے۔ سنجے ملہوترا ریونیو سکریٹری کے طور پر خدمات انجام دے رہے تھے اور راجستھان کیڈر کے 1990 بیچ کے آئی اے ایس افسر ہیں۔
ملہوترا اس سے پہلے گورنمنٹ آر ای سی کے چیئرمین اور منیجنگ ڈائریکٹر کے طور پر کام کر چکے ہیں۔ ٹیکس وصولی میں حالیہ اضافے کو حاصل کرنے میں اہم کردار ادا کیا ہے۔ وہ بجٹ میں ٹیکس سے متعلق تجاویز پر غور کریں گے۔ وہ جی ایس ٹی کونسل کے سابق سکریٹری ہیں۔
