سری نگر: جموں و کشمیر میں اسمبلی انتخابات کے پہلے مرحلے کے لئے 24 نشستوں کی پولنگ انتہائی جوش و خروش اور پر امن طریقے سے اختتام پذیر ہوئی چیف الیکٹورل آفیسر پی کے پولے نے جانکاری فراہم کرتے ہوئے بتایا کہ پہلے مرحلے پر 59فیصد ووٹنگ ریکارد ہوئی ہے انہوں نے کہاکہ کشتواڑ میں سب سے زیادہ 77فیصد رائے دہند گان نے اپنی حق رائے دہی کا استعمال کیا اور پلوامہ میں سب سے کم 46فیصد ووٹنگ ہوئی چیف الیکٹورل آفیسر کے مطابق جموں وکشمیر میں اسمبلی انتخابات کا پہلا مرحلہ پر امن طریقے پر اختتام پذیر ہوا۔
بتادیں کہ جموں و کشمیر میں ایک دہائی کے طویل عرصے کے بعد منعقد ہونے والے اسمبلی انتخابات کے پہلے مرحلے کے لئے بدھ کی صبح 24 حلقوں کے لئے پولنگ شروع ہوئی۔اس مرحلے کےلئے زائد از 23 لاکھ ووٹر حق رائے دہی کے اہل ہیں جبکہ 219 امید وار قسمت آزمائی کر رہے ہیں۔حکام نے پر امن اور ہموار پولنگ کے انعقاد کو یقینی بنانے کے لئے وسیع پیمانے پر سیکورٹی و دیگر انتظامات کئے گئے ہیں۔
لیفٹیننٹ گورنر نے ریکارڈ ٹرن آوٹ پر ووٹروں کو مبارکباد دی
جموں وکشمیر کے لیفٹیننٹ گورنر منوج سنہا نے اسمبلی انتخابات کے پہلے مرحلے کے ووٹروں کو ریکارڈ ٹرن آوٹ کیلئے دلی مبارکباد پیش کی ہے ۔ایک سوشل میڈیا پوسٹ میں لیفٹیننٹ گورنر نے کہا پر جوش شرکت ہندوستانی جمہوریت کی مضبوطی اور جمہوری اقدار پر لوگوں کے اعتماد کا ثبوت ہے ۔
لیفٹیننٹ گورنر نے ایکس پر لکھا:’ایک تاریخی ووٹر ٹرن آوٹ کیلئے جے اینڈ کے کو مبارک ہو ۔ میں تمام ووٹروں کا شکریہ ادا کرنا چاہتا ہوں جنہوں نے پہلے مرحلے میں اپنا حق رائے دہی استعمال کیا ۔ پُر امن ، آزادانہ اور منصفانہ انتخابات میں ریکارڈ پولنگ ہندوستانی جمہوریت کی مضبوطی اور جمہوری اقدار پر لوگوں کے اعتماد کی تصدیق کرتی ہے ۔ ‘
میں اپنے تمام بھائی ، بہنوں اور پہلی بار ووٹ دینے والوں کو جمہوریت کا تہوار منانے کیلئے بڑی تعداد میں شرکت کرنے پر مبارکباد دیتا ہوں ۔ سیکورٹی فورسز ، جے کے پی اور انتخابی عہدیداروں کا تہہ دل سے شکریہ ادا کرتا ہوں ۔ پہلے مرحلے میں تقریباً 59 فیصد پولنگ سے ظاہر ہوتا ہے کہ جموں و کشمیر میں جمہوریت پھل پھول رہی ہے ۔
ڈوڈہ ، کشتواڑ ، رام بن ، پلوامہ ، شوپیاں ، کولگام اور اننت ناگ میں ووٹروں کی لمبی قطاروں نے مخالفین کے پروپیگنڈے کو منہدم کر دیا۔لوگوں نے تقسیم کرنے والے عناصر کے ایجنڈے کو بھی مسترد کر دیا ہے اور جمہوریت پر اپنے اعتماد کا اعادہ کیا ۔
