20 سالہ نوجوان پھسل کر کنویں میں گر کر لقمہ اجل

بانڈی پورہ،سوپور/ شمالی کشمیر کے بانڈی پورہ ضلع کے حاجن علاقے میں ایک20 سالہ نوجوان پھسل کر کنویں میں گر کر لقمہ اجل بن گیا۔جے کے این ایس کے مطابق ذرائع نے بتایا کہ واقعے کے فوراً بعد نوجوان کی لاش کو نکالنے کےلئے فوری ریسکیو آپریشن شروع کیا گیا۔بعد ازاں لڑکے کی شناخت20 سالہ ارشاد احمد ڈار ولد غلام احمد ڈار ساکن حاجن بانڈی پورہ کے طور پر ہوئی ہے۔اس دوران ضلع بارہمولہ میں ایک سڑک حادثے میں3 افراد شدید زخمی ہو گئے۔ اطلاعات کے مطابق ضلع کے رفیع آباد علاقے میں وجی بل کے مقام پر ایک کار زیر رجسٹریشن نمبرJK05A-5398منگل کی صبح تقریباً6 سڑک سے پھسل کر نالے میں جا گری جس کے نتیجے میں اس پر سوار3افراد شدید زخمی ہو گئے۔حادثے کے فوراً بعد سبھی زخمیوں کو علاج و معالجہ کے لیے گورنمنٹ میڈیکل کالج بارہمولہ پہنچایا گیا جہاں ابتدائی طبی امداد کے بعد زخمی ہوئے ایک شخص کو خصوصی علاج و معالجہ کے لیے SKIMS سرینگر ریفر کیا گیا ہے۔ سرینگر ریفر کیے گئے زخمی شہری کی شناخت 45سالہ سمیر احمد ڈار ولد محمد رمضان ڈار ساکنہ خواجہ گلگت سوپور کے طور پر کی گئی ہے۔اس سڑک حادثے میں 2دیگر زخمیوں کی شناخت 35سالہ وسیم بشیر ڈار ولد بشیر احمد ڈار ساکنہ مہاراج پورہ سوپور اور 60 سالہ امتیاز احمد میر ولد غلام نبی میر ساکنہ چیک ودے خان، سوپور کے طور پر ہوئی ہے۔ حادثہ میں کار کو بھی شدید نقصان پہنچا ہے۔ دریں اثناء، سوپور پولیس کے ایک اعلیٰ افسر نے سڑک حادثہ میں 3 افراد کے زخمی ہونے تصدیق کرتے ہوئے کہا کہ انہوں نے اس سلسلے میں مقدمہ درج کر لیا ہے اور مزید تفتیش شروع کر دی گئی ہے۔