جموں: جموں کے بھگوتی نگر بیس کیمپ سے منگل کی صبح قریب 15 سو یاتریوں کا ایک اور قافلہ سخت سیکورٹی حصار میں شری امرناتھ جی یاترا کے لئے کشمیر روانہ ہوا۔
متعلقہ حکام کے مطابق 29 جون سے شروع ہونے والی اس یاترا کے ایک ماہ کے دوران 4 لاکھ 66 ہزار یاتری کشمیر میں 3 ہزار 8 سو 80 فٹ کی بلندی پر واقع پوتر گھپا کے درشن سے فیضیاب ہوئے ہیں جبکہ یاترا میں ابھی تین ہفتے باقی ہیں۔
سرکاری ذرائع نے بتایا کہ بھگوتی نگر بیس کیمپ سے منگل کی صبح 1 ہزار 4 سو 77 یاتری 52 گاڑیوں میں سخت سیکورٹی حصار میں جنوبی کشمیر کے ضلع اننت ناگ میں واقع ننون پہلگام بیس کیمپ اور وسطی کشمیر کے ضلع گاندربل میں واقع بالتل بیس کیمپ کے لئے روانہ ہوئے۔
انہوں نے کہا کہ ان یاتریوں میں سے 3 سو 77 یاتریوں کا پہلا قافلہ 13 گاڑیوں میں صبح کے قریب ساڑھے تین بجے بالتل بیس کیمپ کے لئے روانہ ہوئے جبکہ 11 سو یاتری 39 گاڑیوں میں ننون پہلگام بیس کیمپ کے لئے روانہ ہوئے۔
یاد رہے کہ جموں وکشمیر کے لیفٹیننٹ گورنر منوج سنہا نے 28 جون کی صبح 4 ہزار 6 سو 3 یاتریوں کے پہلے جتھے کو جموں کے بھگوتی نگر بیس کیمپ سے کشمیر کے لئے روانہ کیا تھا۔
وادی میں انتظامیہ، سول سوسائٹی تنظمیوں، تجارتی یونیوں اور عام لوگوں نے یاتریوں کا پرتپاک استقبال کیا۔ یاترا کو تحفظ کو یقینی بنانے کے لئے تمام تر انتطامات کئے گئے ہیں۔ جہاں یاتریوں کو تمام سہولیات و خدمات بہم پہنچانے کے لئے بہترین انتظامات کئے گئے ہیں وہیں سیکورٹی کا بھی فقید المثال بند وبست کیا گیا ہے۔
پولیس ذرائع کے مطابق یاترا روٹوں پر قریب 800 سی سی ٹی وی کیمرے نصب کئے گئے ہیں۔علاوہ ازیں سیکورٹی فورسز کی 500 اضافی کمپنیاں تعینات کی گئیں ہیں۔ ہر کمپنی کم از کم ایک سو اہلکاروں پر مشتمل ہے۔52 دنوں پر محیط یہ یاترا 19 اگست کو رکشا بندھن کے موقع پر اختتام پذیر ہوگی۔
