نئی دہلی، 2 اپریل :  وزیر اعظم نریندر مودی نے پہلے مرحلے کے انتخابات کے قریب آنے کے ساتھ انتخابی مہم تیز کر دی ہے اور وہ منگل کو اڑیسہ کے ضلع کالا ہانڈی کے بھواني پٹنہ کے ساتھ ساتھ بہار میں جموئی اور گیا میں بھی ریلیوں سے خطاب کریں گے۔ اڑیسہ میں لوک سبھا اور اسمبلی انتخابات ایک ساتھ ہونے والے ہیں۔ ریاست میں ایک طرف بیجو جنتا دل پانچویں بار حکومت بنانے کے ساتھ زیادہ سے زیادہ لوک سبھا سیٹ جیتنے کے لئے نئی نئی حکمت عملی بنا رہی ہے وہیں دوسری طرف بھارتیہ جنتا پارٹی (بی جے پی) بھی یہاں زیادہ سے زیادہ سیٹیں جیتنے کی کوشش کر رہی ہے۔
ریاست میں انتخابات کا پہلا مرحلے 11 اپریل سے چار مراحل میں لوک سبھا کی 21 نشستوں اور 147 سیٹوں والی اسمبلی کے لئے ایک ساتھ پولنگ ہوگی۔ پہلے مرحلہ کے تحت کالا ہانڈی، کوراپٹ، بهرام پور، اور نب رنگ پور لوک سبھا سیٹوں پر ووٹنگ کرائی جائے گی۔
بی جے پی ذرائع کے مطابق وزیر اعظم جموئی اور گیا میں بھی آج انتخابی ریلیوں سے خطاب کریں گے۔ دس مارچ کو الیکشن کمیشن کی طرف سے انتخابی تاریخوں کے اعلان کے بعد مسٹر مودی کا یہ پہلا بہار دورہ ہو گا۔ مسٹر مودی نے اتوار کو ویڈیو کانفرنسنگ کے ذریعہ’میں بھی چوکیدار‘ مہم پروگرام میں کہا تھا کہ اس بار بی جے پی اڑیسہ میں لوک سبھا اور اسمبلی، دونوں انتخابات میں بڑی طاقت بن کر ابھرے گی۔ انہوں نے کہا تھا’’اس بار اڑیسہ ملک کو حیرت میں ڈال دے گا. یہ دوسرا تری پورہ بن سکتا ہے‘‘۔
یو این آئی