سری نگر: پیپلز ڈیموکریٹک پارٹی (پی ڈی پی) اور جموں و کشمیر اپنی پارٹی نے پیر کے روز سری نگر میں الگ الگ احتجاجی مظاہرے کیے۔ یہ احتجاج جموں و کشمیر میں بجلی کے نرخوں میں حال ہی میں منظور کیے گئے اضافے کے خلاف کیا گیا۔
پی ڈی پی نے سری نگر میں واقع اپنے پارٹی ہیڈکوارٹر کے باہر احتجاج کیا، جہاں پارٹی کارکنوں اور رہنماؤں نے بینرز اور پلے کارڈز اٹھا کر نیشنل کانفرنس کی قیادت والی حکومت کے خلاف نعرے لگائے اور بجلی کے نرخوں میں اضافے کی مخالفت کی۔
مظاہرین نے حکومت پر الزام عائد کیا کہ وہ بجلی کے زیادہ بلوں کا بوجھ صارفین پر ڈال رہی ہے۔ انہوں نے اس فیصلے پر بھی سوال اٹھایا کہ انتخابی مہم کے دوران نیشنل کانفرنس کی جانب سے مفت بجلی سے متعلق وعدے کیے جانے کے باوجود بجلی کے نرخوں میں اضافہ کیوں کیا گیا؟۔
سری نگر کے پریس انکلیو میں ایک الگ احتجاج کی قیادت جموں و کشمیر اپنی پارٹی کے رہنما محمد اشرف میر نے کی۔ پارٹی کارکنوں نے پلے کارڈز اور بینرز اٹھا رکھے تھے اور حکومت کے خلاف نعرے لگاتے ہوئے بجلی کے نرخوں میں نظرثانی کی مخالفت کی۔
مظاہرین نے "عمر تیری سرکار میں اندھیرا ہی اندھیرا ہے” جیسے نعرے بھی لگائے اور بجلی کے نرخوں میں اضافے پر حکومت کو تنقید کا نشانہ بنایا۔
یہ احتجاج ایسے وقت میں ہوا ہے جب جوائنٹ الیکٹریسٹی ریگولیٹری کمیشن (جے ای آر سی) نے جے پی ڈی سی ایل اور کے پی ڈی سی ایل کے لیے خوردہ بجلی کے نرخوں میں اوسطاً 6.83 فیصد اضافے کی منظوری دی ہے۔ نظرثانی شدہ نرخ یکم ستمبر سے نافذ ہونے والے ہیں۔
احتجاج کرنے والی جماعتوں نے حکومت سے مطالبہ کیا کہ بجلی کے نرخوں میں اضافے کے فیصلے پر نظرثانی کی جائے اور بجلی صارفین پر اضافی مالی بوجھ کو روکنے کے لیے اقدامات کیے جائیں۔
[کے این ٹی]
