نئی دہلی،: جنوبی دہلی کے علاقے ملویا نگر میں ایک ہوٹل عمارت میں بدھ کے روز لگنے والی ہولناک آگ کے نتیجے میں کم از کم 21 افراد جاں بحق جبکہ متعدد زخمی ہو گئے۔ یہ واقعہ حالیہ برسوں میں قومی دارالحکومت میں پیش آنے والے مہلک ترین آتشزدگی کے واقعات میں شمار کیا جا رہا ہے۔
اطلاعات کے مطابق آگ عمارت کی نچلی منزلوں میں قائم ایک ریستوران سے بھڑکی اور تیزی سے پوری عمارت میں پھیل گئی، جس کے باعث درجنوں افراد اندر پھنس گئے۔ ٹیلی ویژن فوٹیج اور عینی شاہدین کے مطابق عمارت دھوئیں کی لپیٹ میں آ گئی جبکہ محصور افراد جان بچانے کے لیے کھڑکیوں اور بالکونیوں کے ذریعے نکلنے کی کوشش کرتے رہے۔ بعض افراد کو بالائی منزلوں سے چھلانگیں لگاتے ہوئے بھی دیکھا گیا۔
آگ لگنے کی اطلاع ملتے ہی فائر بریگیڈ اور ریسکیو ٹیمیں موقع پر پہنچ گئیں اور بڑے پیمانے پر امدادی و انخلائی کارروائی شروع کی۔ حکام کے مطابق 40 سے زائد افراد کو بحفاظت نکال کر مختلف اسپتالوں میں منتقل کیا گیا، جن میں سے کئی زخمیوں کی حالت تشویشناک بتائی جا رہی ہے۔
عہدیداروں نے بتایا کہ متاثرہ عمارت کی گراؤنڈ فلور پر ریستوران جبکہ بالائی منزلوں پر ہوٹل قائم تھا۔ ابتدائی اطلاعات کے مطابق آگ ریستوران کے حصے سے شروع ہوئی، تاہم اس کی اصل وجہ جاننے کے لیے تحقیقات جاری ہیں۔
اس سانحے نے ایک بار پھر تجارتی عمارتوں میں فائر سیفٹی ضوابط پر عمل درآمد سے متعلق سوالات کھڑے کر دیے ہیں، خصوصاً گنجان آباد شہری علاقوں میں جہاں ماضی میں بھی اسی نوعیت کے واقعات کے بعد حفاظتی انتظامات زیرِ بحث آتے رہے ہیں۔
وزیر اعظم نریندر مودی نے قیمتی جانوں کے ضیاع پر گہرے دکھ کا اظہار کرتے ہوئے جاں بحق افراد کے اہلِ خانہ سے تعزیت کی اور زخمیوں کی جلد صحت یابی کے لیے دعا کی۔
حکام نے واقعے کی تحقیقات شروع کر دی ہیں تاکہ آگ لگنے کی اصل وجہ اور عمارت میں فائر سیفٹی قوانین پر عمل درآمد کا جائزہ لیا جا سکے۔
دریں اثنا، وزیر اعلیٰ عمر عبداللہ نے بھی اس المناک واقعے پر گہرے رنج و غم کا اظہار کیا۔ انہوں نے جاں بحق افراد کے لواحقین سے دلی تعزیت کا اظہار کرتے ہوئے زخمیوں کی جلد صحت یابی کے لیے دعا کی اور متاثرہ خاندانوں کے ساتھ یکجہتی کا اظہار کیا۔
