ترکی میں فضائی حادثہ: لیبیا کی فوج کے سربراہ سمیت سینیئر افسران جان سے گئے

یرلیکایا نے سوشل میڈیا پلیٹ فارم ایکس پر کہا کہ چیف آف جنرل سٹاف محمد علی احمد الحداد کے طیارے نے انقرہ کے ایسن بوگا ہوائی اڈے سے شام 5.10 (جی ایم ٹی) پر اڑان بھری اور 42 منٹ بعد ’رابطہ ٹوٹ گیا۔‘وزیر نے کہا کہ طیارے نے انقرہ سے 74 کلومیٹر کے فاصلے پر ہیمانا کے قریب ہنگامی لینڈنگ کا پیغام جاری کیا لیکن رابطہ دوبارہ قائم نہیں ہو سکا۔

ترکی کے ایک سینیئر اہلکار نے بتایا کہ طیارے نے اڑان بھرنے کے 16 منٹ بعد بجلی کی خرابی کی وجہ سے ہنگامی لینڈنگ کی درخواست کی۔جیٹ میں آٹھ مسافر سوار تھے جن میں چیف آف جنرل سٹاف محمد علی احمد الحداد، ان کے وفد کے چار ارکان اور عملے کے تین ارکان شامل تھے۔

صدر کے کمیونیکیشن ڈائریکٹوریٹ کے سربراہ برہانیٹن دوران نے ایکس پر لکھا کہ ’برقی خرابی کی وجہ سے (جہاز نے)
ایئر ٹریفک کنٹرول سنٹر کو ایمرجنسی کی اطلاع دی اور ہنگامی لینڈنگ کے لیے کہا۔‘ترکی کے وزیر انصاف یلماز تنک نے کہا کہ انقرہ کے چیف پراسیکیوٹر کے دفتر نے واقعے کی تحقیقات شروع کر دی ہیں۔

’بم کی طرح‘

ترکی کے متعدد ذرائع ابلاغ نے ایسی تصاویر نشر کیں جن میں طیارے نے سگنل بھیجنے والے مقام سے سے دھماکے کی آواز آئی اور شعلے بڑھکے۔ہیمانا کے ایک مقامی برہان سیسک نے اس لمحے کو یاد کیا جب طیارہ گر کر تباہ ہوا۔

انہوں نے اے ایف پی کو بتایا کہ ’میں نے دھماکے کی ایک بڑی آواز سنی۔ یہ ایک بم جیسا تھا۔‘انقرہ میں لیبیا کے سفیر بھی اس مقام پر موجود تھے۔

لیبیا کے وزیر مملکت برائے مواصلات اور سیاسی امور ولید ایلافی نے مقامی ٹیلی ویژن چینل لیبیا الاحرار کو بتایا کہ ترک حکومت نے لیبیا کی حکومت کو واقعے سے آگاہ کر دیا ہے۔

وزیر نے کہا کہ ’ہمیں واقعے کے فوراً بعد ترک حکام کی طرف سے کال موصول ہوئی، جس میں بتایا گیا کہ طیارے سے رابطہ منقطع ہو گیا ہے۔‘انہوں نے مزید کہا کہ ’انقرہ ہوائی اڈے سے ٹیک آف کے تقریباً آدھے گھنٹے بعد تکنیکی خرابی کی وجہ سے طیارے سے تمام رابطہ منقطع ہو گیا۔

’ہم ترکی کی تحقیقات کے نتائج کا انتظار کر رہے ہیں اور ایسا لگتا ہے کہ طیارہ گر کر تباہ ہوا ہے۔‘ محمد علی احمد الحداد اگست 2020 سے فوج کے چیف آف جنرل سٹاف تھے اور ان کا تقرر اس وقت کے وزیر اعظم فیاض السراج نے کیا تھا۔

لیبیا طرابلس میں اقوام متحدہ کی تسلیم شدہ حکومت کے درمیان تقسیم ہے جس کی قیادت دبیبہ کر رہے ہیں اور مشرق میں کمانڈر خلیفہ حفتر کی انتظامیہ ہے۔شمالی افریقی ملک 2011 میں نیٹو کی حمایت یافتہ بغاوت کے خاتمے اور دیرینہ رہنما معمر قذافی کی موت کے بعد سے منقسم ہے۔

ترکی کے طرابلس میں اقوام متحدہ کی حمایت یافتہ حکومت کے ساتھ قریبی تعلقات ہیں، جس کو وہ اقتصادی اور فوجی مدد فراہم کرتا ہے اور دونوں فریقوں کے درمیان اکثر دورے ہوتے رہے ہیں۔

لیکن انقرہ نے حال ہی میں ترکی کی انٹیلی جنس ایجنسی کے سربراہ ابراہیم قالن کی اگست میں بن غازی میں حفتر سے ملاقات کے ساتھ مشرق میں حریف انتظامیہ تک بھی رسائی حاصل کی ہے۔

عالمی میڈیا رپورٹس