جموں: جموں و کشمیر کے وزیر اعلیٰ عمر عبداللہ نے جمعرات کو ضلع کٹھوعہ میں سیلاب سے متاثرہ علاقوں کا فضائی سروے کیا۔بعد میں انہوں نے ڈوگین، بلور کے رہائشیوں سے ملاقات کی جن کے گھر حالیہ سیلاب سے متاثر ہوئے تھے اور اس کے بعد ضلعی انتظامیہ کے افسران کے ساتھ ایک میٹنگ بھی کی۔وزیر اعلیٰ نے متاثرین کو تمام ممکنہ امداد کی یقین دہانی کرائی اور انتظامیہ کو ہدایت کی کہ متاثرہ افراد کو ضروری امداد فراہم کی جائے۔وزیر اعلیٰ جمعرات کو ضلع کٹھوعہ کے دورے پر ہیں۔
قبل ازیں وزیر اعلیٰ کے دفتر کے ایکس ہینڈل پر ایک پوسٹ میں کہا گیا ’وزیر اعلیٰ نے اپنے دورہ کٹھوعہ دوران ضلع میں سیلاب سے متاثرہ علاقوں کا فضائی سروے کیا‘۔پوسٹ میں مزید کہا گیا ’ بعد میں وزیر اعلیٰ متاثرہ خاندانوں کے ساتھ بات چیت اور بلو میں ضلعی انتظامیہ کے ساتھ بھی ایک میٹنگ کریں گے‘۔واضح رہے کہ ضلع کٹھوعہ میں بھی گذشتہ ماہ بادل پھٹنے کے نتیجے میں آنے والے سیلاب سے وسیع پیمانے پر تباہی مچادی۔
ذرائع کے مطابق اس واقعے میں 4 سے 5 انسانی جانوں کا بھی زیاں ہوا تھا۔
کٹھوعہ میں قدرتی آفت کا یہ واقع کشتواڑ میں 14 اگست کو پیش آنے والے بادل پھٹنے کے انتہائی دلدوز واقعے کے تین روز بعد پیش آیا تھا۔
