جموں: منشیات کے خلاف کارروائی جاری رکھتے ہوئے جموں پولیس نے ایک اور منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں کہا کہ ایک مصدقہ اطلاع پر کارروائی کرتے ہوئے پولیس اسٹیشن ڈومانا کی ایک ٹیم نے موتھی علاقے میں ایک خصوصی ناکے کے دوران ایک شخص کو روکا۔
انہوں نے کہا کہ تلاشی کے دوران اس کی تحویل سے تقریباً 52 گرام ہیروئن جیسا مواد بر آمد کیا گیا جس کے بعد اس کی بر سر موقع ہی گرفتاری عمل میں لائی گئی۔ملزم کی شناخت وشال سنگھ ولد بلونت سنگھ ساکن ستوری جموں کے طور پر ہوئی ہے۔
ان کا کہنا ہے کہ وہ مبینہ طور پر علاقے میں منشیات لے کر گھوم رہا تھا۔
بیان میں کہا گیا کہ اس سلسلے میں پولیس اسٹیشن ڈومانا میں این ڈی پی ایس ایکٹ کے تحت زیر ایف آئی آر نمبر208/2025 ایک مقدمہ درج کیا گیا اور مزید تحقیقات شروع کی گئی۔
انہوں نے کہا کہ پولیس ضلع میں منشیات کے خاتمے کے لئے پر عزم ہے۔
