حضرت بل درگاہ کے اطراف صفائی و سہولیات کا فقدان
ایشین میل نیوزڈیسک
سرینگر،:اگرچہ حضرت بل درگاہ کے اندر زائرین کیلئے وقف بورڈ کی جانب سے مختلف سہولیات فراہم کی گئی ہیں، تاہم درگاہ کے اردگرد علاقوں میں صفائی اور بنیادی سہولیات کی شدید کمی دیکھنے کو مل رہی ہے۔ ان باتوں کا اظہار سابق میونسپل کارپوریٹر محمد سلیم لون نے اپنے ایک تحریری بیان میں کیا ہے۔سلیم لون نے الزام عائد کیا کہ ضلع کمشنر سرینگر کی واضح ہدایات کے باوجود متعلقہ انتظامیہ کوئی عملی قدم نہیں اٹھا رہی۔
ان کا کہنا تھا کہ مقدس ایام کے دوران حبک سے لالبازار تک ٹریفک جام روز کا معمول بن چکا ہے، جس کے باعث زائرین کو شدید مشکلات کا سامنا کرنا پڑ رہا ہے، خاص طور پر پارکنگ کی سہولت نہ ہونے کی وجہ سے یہ مشکلات عوام کو درپیش ہیں۔انہوں نے مزید کہا کہ درگاہ کے ملحقہ علاقوں میں اکثر بجلی غائب رہتی ہے، اسٹریٹ لائٹس خراب پڑی ہیں اور جگہ جگہ گندگی کے ڈھیر جمع ہو چکے ہیں، جس سے نہ صرف زائرین بلکہ مقامی آبادی کو بھی پریشانی کا سامنا ہے۔سلیم لون نے لیفٹیننٹ گورنر منوج سنہا اور سابق وزیراعلیٰ عمر عبداللہ سے اپیل کی ہے کہ وہ ذاتی طور پر معاملے کا نوٹس لیں اور انتظامیہ کو فوری طور پر متحرک کرکے حضرت بل آنے والے زائرین کیلئے تمام ممکن سہولیات کی فراہمی یقینی بنائیں۔
