بولی وْڈ اور کشمیری فنکار ایک ساتھ، فلم یکم اکتوبر 2026 کو ریلیز ہوگی: سہیل سعید لون
محبوب جیلانی
سرینگر / طاہا فلمز انٹرنیشنل کے بینر تلے ایک بڑا فلمی منصوبہ ’’دی ساگا آف راشٹریہ رائفلز‘‘ (The Saga Rashtriya Rifles)کا باضابطہ اعلان کر دیا گیا ہے۔ فلم کے پروڈیوسر سہیل سعید لون اور رائٹر و ڈائریکٹر منظور احمد نے ایک مشترکہ پریس کانفرنس میں اس پراجیکٹ کی تفصیلات شیئر کیں۔ انہوں نے بتایا کہ فلم کشمیر کے حقیقی واقعات پر مبنی ہے اور وزارتِ دفاع کے ساتھ ساتھ (ADGPI) نے اس اسکرپٹ کو باضابطہ منظوری دے دی ہے۔ فلم کی ریلیز کی تاریخ یکم اکتوبر 2026 مقرر کی گئی ہے۔ان کا کہناتھا :’یہ تاریخی پروجیکٹ راشٹریہ رائفلز کے قیام سے لے کر دنیا کی صفِ اول کی انسدادِ دہشت گردی فورس بننے تک کے سفر کو پیش کرے گا۔ اس میں ان کی قربانیوں، کشمیری عوام کے ساتھ مل کر کی گئی ترقیاتی اور انسانی ہمدردی پر مبنی کاوشوں،’آپریشن سدبھاؤنا‘کے تحت اسکولوں، اسپتالوں، تعلیمی اداروں کے قیام اور نوجوانوں کو بااختیار بنانے جیسے پہلوؤں کو اجاگر کیا جائے گا۔انہوں نے کہا کہ اس پروجیکٹ کے لیے بالی وْڈ اور کشمیری فنکار ایک ساتھ اسکرین پر جلوہ گر ہوں گے۔
مقامی فنکاروں میں میر سرور، فرحانہ بٹ، یوسف میر، نذیر جوش، ضمیر عاشائی، عاقب سوب اور فیصل شیخ شامل ہیں۔ ان کے ساتھ بالی وْڈ کے معروف اداکار اشوتوش رانا، پیوش مشرا، ارجن رامپال، اکشے اوبری، راجت کپور، منوج جوشی، نورا فتیحی، ستیا راج، طہٰ شاہ، جیوا اور دیگر بھی شامل ہوں گے۔فلم کی شوٹنگ دسمبر 2025 سے شروع ہوگی،
جس میں بھارتی فلم انڈسٹری کے کئی بڑے تکنیکی ماہرین بھی شامل ہیں، جن میں پرکاش کْٹی (ڈائریکٹر آف فوٹوگرافی)، وشنو نشاد (پروڈکشن ڈیزائنر)، نعیم شبیر (موسیقی)، روی چترویدی (ایگزیکٹو پروڈیوسر)، انیرودھ سنگھ (کاسٹیوم ڈیزائنر)، سنجے شرما (ایڈیٹر)، مرتنجے (سائونڈ ڈیزائنر)، ریحان قادِر (ایسوسی ایٹ پروڈیوسر)، مہرین اقبال (پروڈکشن منیجر) اور بابو بھائی تھبا (کاسٹنگ ڈائریکٹر) کے نام شامل ہیں۔انہوں نے فلم کو ’حوصلے، قربانی اور اتحاد کی علامت‘ قرار دیا کہ توقع ہے کہ یہ وادی کشمیر میں امید اور ترقی کا نیا پیغام لے کر آئے گی۔جبکہ یہ فلم کشمیر فلم انڈسٹری کے لئے سنگ میل بھی ثابت ہوسکتی ہے ۔
