جموں:وزیر دفاع راجناتھ سنگھ اور جموں و کشمیر کے لیفٹیننٹ گورنر منوج سنہا اتوار کو ضلع کشتواڑ کے چسوتی گاؤں کا دورہ کریں گے، جہاں حالیہ بادل پھٹنے کے سبب تباہ کن سیلاب آیا تھا۔
ذرائع نے بتایا کہ وزیر دفاع اور لیفٹیننٹ گورنر مشترکہ طور پر جاری سرچ آپریشن کا جائزہ لیں گے جو پچھلے نو روز سے فوج، این ڈی آر ایف، ایس ڈی آر ایف اور مقامی پولیس کی جانب سے مسلسل جاری ہے۔ اس کے ساتھ ساتھ وہ متاثرہ گاؤں کے لوگوں سے ملاقات کر کے ان کے مسائل اور ضروریات کو قریب سے جاننے کی کوشش کریں گے۔
قابل ذکر ہے کہ چسوتی گاؤں میں 14 اگست کو بادل پھٹنے کے بعد آنے والے سیلاب نے بڑے پیمانے پر جانی و مالی نقصان پہنچایا۔ ریسکیو ٹیمیں تاحال لاپتہ افراد کی تلاش میں سرگرم ہیں جبکہ حکومت نے متاثرین کی بازآبادکاری اور معاوضے کے لیے اقدامات تیز کر دیے ہیں۔
