سری نگر: منشیات فروشوں کے خلاف کریک ڈائون کو وسیع پیمانے پر جاری رکھتے ہوئے پولیس نے وسطی کشمیر کے ضلع بڈگام کے چاڈورہ علاقے میں ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں کہا کہ پولیس اسٹیشن چاڈورہ کی ایک ٹیم نے نوبگ گائوں میں ایک ناکے کے دوران ایک مشکوک شخص کو روکا جس نے ایک پالیتھین بیگ اٹھایا تھا۔
انہوں نے کہا کہ گرچہ اس شخص نے پولیس کو دیکھ کر فرار ہونے کی کوشش کی تاہم اس کو موقع پر ہی دھر لیا گیا۔
ان کا کہنا ہے کہ تلاشی کے دوران اس کی تحویل سے 2.92 کلو خشخاش بھوسہ جیسا ممنوعہ مواد بر آمد کیا گیا جس کے بعد اس کی بر سر موقع ہی گرفتاری عمل میں لائی گئی۔
گرفتار شدہ کی شناخت ہلال احمد ڈار ولد عبدالرشید ڈار ساکن نوبگ چاڈورہ کے طور پر ہوئی ہے۔
بیان میں کہا گیا کہ اس سلسلے میں پولیس اسٹیشن چاڈورہ میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔
انہوں نے کہا کہ بڈگام پولیس منشیات کی بیخ کنی کو یقینی بنانے کے لئے پر عزم ہے۔
