جموں،:منشیات کی بیخ کنی کے لئے جنگ کو جاری رکھتے ہوئے پولیس نے جموں کے راجیو نگر علاقے میں ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے۔
ایک پولیس ترجمان نے بتایا کہ پولیس پوسٹ نروال کی ایک ٹیم نے معمول کی گشت کے دوران راجیو نگر علاقے کے نزدیک ایک مشکوک شخص کو روکا۔انہوں نے کہا کہ تلاشی کے دوران اس کی تحویل سے قریب 14 گرام ہیروئن جیسا ممنوعہ مواد بر آمد کیا گیا جس کے بعد اس کی گرفتاری عمل میں لائی گئی۔
گرفتار شدہ کی شناخت منظور احمد صوفی ولد بشیر احمد صوفی ساکن سوپور بارہمولہ کے طور پر ہوئی ہے۔بیان میں کہا گیا کہ اس سلسلے میں پولیس اسٹیشن بہو فورٹ جموں میں این ڈی پی ایس ایکٹ کے تحت ایک کیس درج کرکے مزید تحقیقات شروع کی گئیں۔انہوں نے کہا کہ جموں پولیس منشیات کی بیخ کنی کو یقینی بنانے کے لئے پر عزم ہے۔
