کوچی،: سائنسدانوں کا ماننا ہے کہ آب و ہوا میں تبدیلی کی وجہ سے مچھلیوں کے حیاتیاتی دورانیے میں تبدیلی آ رہی ہے، جس سے مچھلیوں کی افزائش نسل کی شرح متاثر ہو رہی ہے۔سینٹرل مرین فشریز ریسرچ انسٹی ٹیوٹ کے ڈائریکٹر ڈاکٹر گرنسن جارج نے یہ حیرت انگیز معلومات یہاں منعقدہ ایک قومی سیمینار میں فراہم کیں۔
ماہرین کا کہنا ہے کہ ہندوستانی سارڈین جیسی انواع شمال کی طرف نقل مکانی کر رہی ہیں۔ ایسا خوراک کی دستیابی، بارش، سمندری لہروں اور آکسیجن کی سطح میں تبدیلی کی وجہ سے ہو سکتا ہے۔یہ دو روزہ سیمینار ’’سمندری ماحولیاتی نظام پر آب و ہوا میں تبدیلی کے اثرات کو کم کرنا‘‘ کے موضوع پر منعقد کیا گیا تھا۔ اس میں سماجی سائنس کے ادارے کے سینئر ماہرین نے بھی حصہ لیا۔
اس سیمینار میں موافق انتظامی حکمت عملیوں، سماجی و اقتصادی لچیلے پن، ماحولیات کے لیے سازگار اقدامات، جدت طرازی اور ابھرتی ہوئی ٹیکنالوجیز سمیت کئی موضوعات پر بحث کی گئی۔
یو این آئی
