سرینگر : فوج کی چنار کور کی جانب سے جاری کردہ بیان کے مطابق سرینگر کے داچھی گام، ہارون جنگلی علاقے کے جنرل ایریا لیڈواس میں ’’آپریشن مہادیو‘‘ کے دوران سیکیورٹی فورسز اور دہشت گردوں کے درمیان آمنا سامنا ہوا ہے۔ علاقے میں تلاشی کارروائی بڑے پیمانے پر جاری ہے۔
فوجی ذرائع کے مطابق یہ آپریشن خفیہ اطلاعات موصول ہونے کی بنیاد پر فوج کی 24 راشٹریہ رائفلز نے شروع کیا۔ فورسز نے پورے علاقے کو محاصرے میں لے کر چھپے مشتبہ دہشت گردوں کی تلاش شروع کر دی ہے۔ جبکہ فوجی ذرائع کے مطابق اس دوران طرفین کے درمیان فائرنگ کا تبادلہ بھی ہوا ۔ تاہم فوری طور پر کسی جانی نقصان کی کوئی اطلاع موصول نہیں ہوئی ہے۔
چنار کور نے اپنے سوشل میڈیا ہینڈل پر ایک مختصر بیان میں اس کی تصدیق کرتے ہوئے لکھا: ’’’’آپریشن مہادیو-جنرل ایریا لڈواس میں (دہشت گردوں کے ساتھ) آمنا سامنا، آپریشن جاری۔‘‘
ادھر، علاقے میں اضافی فورسز کو تعینات کیا گیا ہے اور لوگوں سے اپیل کی گئی ہے کہ وہ افواہوں سے باز رہیں اور فورسز کے ساتھ تعاون کریں۔
