برازیلیا/نئی دہلی: ہندوستان اور برازیل نے ہر شعبے میں دوطرفہ تعاون کو مضبوط بنانے اور دونوں ملکوں کے عوام کے درمیان باہمی روابط اور کاروباری تعلقات کو فروغ دینے کے مشترکہ اہداف کو حاصل کرنے کے لیے تین معاہدوں اور کئی دیگر مفاہمت ناموں پر دستخط کیے ہیں۔
برازیل کے سرکاری دورے پر آئے ہوئے وزیر اعظم نریندر مودی اور برازیل کے صدر لولا ڈی سلوا کے درمیان ان معاہدوں پر منگل کی دہر رات دو طرفہ میٹنگ اور وفود کی سطح کی بات چیت کے بعد دستخط کیے گئے۔
مسٹر مودی اور مسٹر لولا کی موجودگی میں، دونوں ممالک کے افسران نے بین الاقوامی دہشت گردی اور منظم جرائم سے نمٹنے میں تعاون، خفیہ اطلاعات کے تبادلے اور باہمی تحفظ کے معاہدے اور شہری معاملات میں باہمی قانونی مدد کے معاہدے پر دستخط کئے۔
اس کے علاوہ قابل تجدید توانائی میں تعاون پر مفاہمت نامے، برازیل کے محکمہ زراعت اور انڈین کونسل آف ایگریکلچرل ریسرچ کے درمیان زرعی تحقیق پر مفاہمت نامے، ڈیجیٹل تبدیلی کے لیے بڑے پیمانے پر کامیاب ڈیجیٹل حل کے اشتراک کے لیے تعاون پر مفاہمت نامے، دانشورانہ املاک کے شعبے میں تعاون کے لیے مفاہمت نامے پر بھی دستخط کیے گئے۔
دونوں رہنماؤں نے اپنے اپنے ممالک کے متعلقہ سرکاری اداروں کو بھی ہدایت کی کہ وہ جلد از جلد بعض دیگر دو طرفہ معاہدوں کو پایہ تکمیل تک پہنچانے کے مقصد سے تعاون کریں۔ ان میں دفاعی صنعتی تعاون پر مفاہمت نامے، کھیلوں کے شعبے میں تعاون پر مفاہمت نامے، آرکائیول تعاون اور ثقافتی تبادلہ پروگرام (سی ای پی) 2025-2029 شامل ہیں۔
دونوں ممالک نے اپنی خارجہ پالیسی کے رہنما اصولوں کے طور پر امن، خوشحالی اور پائیدار ترقی کے اعلیٰ مقاصد کو یاد کرتے ہوئے، تکثیری شناخت والے دو متحرک جمہوریتوں کے درمیان بڑھتے تعاون کے ایجنڈے پر اتفاق کیا۔ یہ ایجنڈا سبھی کے لئے زیادہ منصفانہ، زیادہ شمولیاتی اور زیادہ پائیدار دنیا کے شریک تخلیق کار کے طور پر بین الاقوامی معاملات میں دونوں ممالک کے مخصوص کردار کو مطابق ہے۔
برازیل کا نتیجہ خیز دورہ مکمل کرنے کے بعد، مسٹر مودی اپنے پانچ ملکوں کے دورے کے آخری مرحلے میں نمیبیا کے لیے روانہ ہوگئے۔
وزیراعظم کے دورہ نمیبیا کا مقصد دوطرفہ تعلقات کو مضبوط بنانا ہے۔ بنیادی توجہ تعلیم، دفاع، تجارت، جنگلی حیات کے تحفظ اور یورینیم کے تعاون پر ہوگی۔
نمیبیا سے پہلے وزیر اعظم چار ممالک گھانا، ٹرینیڈاڈ اور ٹوباگو، ارجنٹینا اور برازیل کا دورہ کر چکے ہیں۔
یو این آئی
