بجبہاڑہ قتل کیس: ایس آئی اے کی چھاپہ مار کارروائیاں، تفتیش میں اہم پیش رفت

سری نگر،:ریاستی تحقیقاتی ایجنسی (ایس آئی اے) کشمیر نے جنوبی کشمیر کے ضلع اننت ناگ کے بجبہاڑہ علاقے میں ایک قتل کیس کی تفتیش کے سلسلے میں دو مشتبہ افراد کے رہائشی مقامات پر تلاشی کارروائیاں انجام دیں۔
تفتیشی ایجنسی کے ترجمان کے مطابق یہ چھاپے 17 اپریل 2024 کو پیش آئے راجا سہ کے قتل کی تحقیقات کے تحت مارے گئے، جو کہ ایف آئی آر نمبر 87/2024 کے تحت درج مقدمے سے جُڑا ہے۔ یہ مقدمہ تعزیراتِ ہند کی دفعہ 302، آرمز ایکٹ کی دفعہ 7/27، اور غیر قانونی سرگرمیاں (روک تھام) ایکٹ (یو اے پی اے) کی دفعات 13، 16 اور 20 کے تحت درج کیا گیا ہے۔
ایس آئی اے نے بتایا کہ یہ کارروائیاں مکمل منصوبہ بندی، قانونی اجازت اور قواعد و ضوابط کے تحت کی گئیں، جن کے دوران ایسے شواہد برآمد ہوئے ہیں جو نہ صرف قتل کے پس پردہ سازش کو بے نقاب کریں گے بلکہ ملزمان کے ممکنہ معاونین کی شناخت میں بھی معاون ثابت ہوں گے۔
ترجمان کے مطابق برآمد شدہ شواہد سے تفتیش کو نئی سمت ملی ہے اور یہ تحقیقات کو مضبوط بنانے میں اہم کردار ادا کریں گے۔ ایس آئی اے کا کہنا ہے کہ ان کارروائیوں کا مقصد نہ صرف اصل مجرموں کو کیفر کردار تک پہنچانا ہے بلکہ اُن دہشت گرد نیٹ ورکس کو بھی توڑنا ہے جو اس طرح کی وارداتوں کے پس پردہ سرگرم ہوتے ہیں۔
ایجنسی نے اس عزم کا اعادہ کیا ہے کہ وہ جموں و کشمیر میں پرامن ماحول کو خراب کرنے والی کسی بھی کوشش کے خلاف سخت کارروائی کرے گی اور شہریوں کی جان و مال کے تحفظ کو ہر حال میں یقینی بنایا جائے گا۔