سری نگر حج ہائوس سے عازمین حج کا دوسرا قافلہ روانہ

سری نگر:  ہندوستان اور پاکستان کے درمیان جنگ بندی معاہدے پر اتفاق کے بعد عازمین حج کا مکہ معظمہ کی طرف رخ کرنے کا سلسلہ دوبارہ شروع ہوا۔سری نگر میں واقع حج ہائوس سے بدھ کی صبح 151 عازمین حج پر مشتمل دوسرا قافلہ روانہ ہوا۔

جموں وکشمیر حج کمیٹی کے مطابق بدھ کے روز دو پروازوں میں عازمین حج سفر محمود پر روانہ ہوں گے۔سری نگر سے عازمین کا پہلا قافلہ 4 مئی کو روانہ ہوا تھا۔واضح رہے کہ ہندوستان اور پاکستان نے ہفتہ کو لائن آف کنٹرول اور بین الاقوامی سرحد پر جنگ بندی پر اتفاق کیا۔

دونوں ملکوں کے درمیان کشیدگی اس وقت بڑھ گئی جب ہندوستانی مسلح افواج نے گزشتہ ہفتے پہلگام حملے کے جواب میں پاکستان اور پاکستان کے زیر قبضہ جموں و کشمیر (پی او جے کے) میں دہشت گردوں کے لانچ پیڈ کو نشانہ بنایا۔

اس کے بعد پیدا شدہ صورتحال کے پیش نظر سری نگر ہوائی اڈے کو احتیاطی طور پر بند کر دیا گیا تھا اور جموں وکشمیر حج کمیٹی نے بھی حج پروازوں کو ملتوی کر دیا تھا۔

متعلقہ حکام کا کہنا ہے کہ 14 اور 15 مئی کی حج پروازیں پہلے شیڈول کے مطابق ہی ہوں گی۔انہوں نے کہا کہ ان کے بغیر جو پروازیں منسوخ ہوئی تھیں ان کا نیا شیڈول بنایا جائے گا۔۔

ان کا کہنا تھا: ‘ہماری کل 11 پروازیں تھیں جن میں سے 3 ہزار 3 سو 78 عازمین کو جانا تھا اس میں 4 مئی کو 178 عازمین کا ایک قافلہ روانہ ہوا ہے’۔ادھر حج ہائوس پر جمع ہونے والے عازمین میں انتہائی جوش وخروش تھا۔

عازمین حج خواہ وہ مر د تھے یا خواتین شہر مقدس کے دیدار کے لئے بے قرار نظر آ رہے تھے اور شوق سفر میں آبدیدہ تھے۔ایک خاتون عازم نے اشکبار آنکھوں سے کہا: ‘اللہ تعالیٰ نے ہمیں یہ سعادت بخشی،یہ ہماری خوش نصیبی ہے، اب بس یہی دعا ہے کہ ہمارا حج قبول ہو’۔

انہوں نے کہا: ‘ہم وہاں سب کے خوشی و خوشحالی کے لئے دعا کریں گے’۔

یو این آئی