کشمیر موسم خشک و خوشگوار، ماہ رواں کے اختتام تک کسی بڑی تبدیلی کا کوئی امکان نہیں

سری نگر: وادی کشمیر میں موسم خشک و خوشگوار ہے اور محکمہ موسمیات کی پیش گوئی کے مطابق وادی میں ماہ رواں کے اختتام تک موسم میں کسی بڑی تبدیلی کا کوئی امکان نہیں ہے۔
متعلقہ محکمے کے ایک ترجمان نے بتایا کہ وادی میں 20 سے 26 مارچ تک موسم مجموعی طور پر خشک رہنے کا امکان ہے تاہم اس دوران 25 مارچ کی شام کو کہیں کہیں ہلکی برف باری یا بارشیں ہوسکتی ہیں۔انہوں نے کہا کہ وادی میں 27 اور 28 مارچ کو پہاڑی علاقوں میں کہیں کہیں ہلکی برف باری یا بارشیں متوقع ہیں۔
موصوف ترجمان نے کہا کہ بعد ازاں 29 سے 31 مارچ تک موسم ایک بار پھر مجموعی طور پر خشک رہنے کا امکان ہے۔انہوں نے بتایا کہ وادی میں ماہ رواں کے اختتام تک موسم میں کسی بڑی تبدیلی کا کوئی امکان نہیں ہے۔محکمے نے اپنی ایڈوائزری میں کہا ہے کہ مسافروں، سیاحوں اور ٹرانسپورٹروں کو ٹریفک ایڈوائزریز پر عمل کرنا چاہئے۔
انہوں نے کسانوں سے کہا ہے کہ وہ اپنے کھیت کھلیانوں اور باغوں میں اپنے آپریشنز جاری رکھیں جبکہ لوگوں سے کہا گیا ہے ان علاقوں میں جانے سے گریز کریں جہاں برفانی تودے گر آنے کے خطرے رہتے ہیں۔
دریں اثنا وادی میں شبانہ درجہ حرارت میں بہتری واقع ہوئی ہے۔
شہرہ آفاق سیاحتی مقام گلمرگ وادی کی سرد ترین جگہ رہی ہے جہاں کم سے کم درجہ حرارت منفی 1.6 ڈگری سینٹی گریڈ ریکارڈ ہوا ہے جبکہ وادی کے دوسرے مشہور سیاحتی مقام پہلگام میں شبانہ درجہ حرارت3.2 ڈگری سینٹی گریڈ ریکارڈ ہوا ہے۔