نیوزڈیسک
سری نگرجموں وکشمیر کے وزیر اعلیٰ عمر عبداللہ نے ہفتے کی سہ پہرگگن گیر سونہ مرگ کا دورہ کیا اور وہاں پر تیاریوں کا جائزہ لیا۔اس موقع پر صوبائی کمشنر کشمیر اور پولیس کے اعلیٰ حکام نے وزیر اعلیٰ کو سیکورٹی انتظامات کے بارے میں جانکاری فراہم کی۔اطلاعات کے مطابق وزیر اعلیٰ عمر عبداللہ نے گگن یر سونہ مرگ میں زڈ مورہ ٹنل کا دورہ کیا اور وہاں پر انتظامات کا بچشم جائزہ لیا۔صوبائی کمشنر کشمیر نے وزیر اعلیٰ کو جانکاری فراہم کرتے ہوئے بتایا کہ وزیر اعظم کے دورے کے پیش نظر سیکورٹی کے غیر معمولی انتظامات کئے گئے ہیں۔وزیر اعلیٰ عمر عبداللہ نے دورے کے بعد ایکس پر جانکاری فراہم کرتے ہوئے بتایا :’پیر کو وزیر اعظم نریندر مودی جی کے دورے کے پیش نظر تیاریوں کا جائزہ لینے کی خاطر سونہ مرگ کا دورہ کیا۔‘انہوں نے کہاکہ زڈ مورہ ٹنل کے باعث اب سونہ مرگ سال بھر سیاحت کے لئے کھلا رہے گااور یہ کہ اس سیاحتی مقام کو اب بہترین سکی ریزاٹ کے طورپر تیار کیا جائے گا۔وزیر اعلیٰ نے مزید کہا کہ زڈ مورہ ٹنل کی وجہ سے مقامی لوگوں کو یہاں سے اب کئی جانے کی ضرورت نہیں۔ اوراب سری نگر سے کرگل جانے میں بھی کم وقت صرف ہوگا۔بتادیں کہ وزیرا عظم نریندر مودی 13جنوری کو زڈ مورہ ٹنل کا افتتاح کریں گے۔ دورے کے پیش نظر سری نگر اور گاندربل میں سیکورٹی کے غیر معمولی انتظامات کئے گئے ہیں۔ادھر سرکاری ترجمان کے مطابق وزیر اعظم نریندر مودی کے ذریعہ سونمرگ ٹنل کے باضابطہ افتتاح سے پہلے وزیر اعلیٰ عمر عبداللہ نے آج گاندر بل ضلع کے سونمرگ میں پروجیکٹ سائٹ پر انتظامات کا وسیع جائیزہ لیا ۔ وزیر اعلیٰ کے مشیر ناصر اسلم وانی اور ایم ایل اے کنگن میاں مہر علی کی موجودگی میں وزیر اعلیٰ کو چیف سیکرٹری اتل ڈولو اور ڈویژنل کمشنر کشمیر وجے کمار بدھوری نے سرینگر۔ لہیہ ہائی وے پر اسٹریٹجک 6.4 کلو میٹر ٹنل کے افتتاح کی جامع تیاریوں کے بارے میں بریفنگ دی ۔ وزیر اعلیٰ نے ٹنل ٹیوبوں کا معائینہ کیا اور پروجیکٹ کی تعمیر میں شامل انجینئرز اور ورکرز سے بات چیت کی اور اس اہم انفراسٹرکچر کو مکمل کرنے میں ان کی کوششوں کو سراہا ۔ انہوں نے اس مقام کا بھی دورہ کیا جہاں وزیر اعظم مودی ایک عوامی اجتماع سے خطاب کرنے والے ہیں اور اس منصوبے کو باضابطہ طور پر قوم کے نام وقف کریں گے ۔ خطے کی سیاحتی صلاحیت کی عکاسی کرتے ہوئے وزیر اعلیٰ نے گاندر بل کو سرمائی کھیلوں کی ایک اہم منزل کے طور پر پوزیشن دینے کے اپنے وژن کا اعادہ کیا ۔ انہوں نے اس بات پر زور دیا کہ سونمرگ ٹنل نہ صرف سونمرگ سے ہمہ موسمی رابطے کو یقینی بنائے گی بلکہ گلمرگ کو اسکیئنگ اور سرمائی کھیلوں کی ایک اور منزل کے طور پر بھی پورا کرے گی جس سے سیاحت اور اقتصادی ترقی کی نئی راہیں کھلیں گی ۔ سونمرگ ٹنل سرینگر اور لہیہ کے درمیان رابطے کو بہتر بنانے ، سونمرگ تک ہر موسم کی رسائی کو یقینی بنانے اور خطے کے اقتصادی اور سیاحتی امکانات کو بڑھانے میں ایک اہم سنگِ میل ہے ۔
