رواں اسمبلی انتخابات سے جموں وکشمیر میں ایک نیا باب شروع ہوگا: سید الطاف بخاری

سری نگر: جموں وکشمیر اپنی پارٹی کے صدر سید الطاف بخاری نے امید ظاہر کی ہے کہ رواں اسمبلی انتخابات سے جموں و کشمیر میں ایک نیا باب شروع ہوگا۔انہوں نے کہا کہ جو لوگ اقتدار میں آئیں ان سے لوگوں کے احساسات و جذبات کو صحیح ترجمانی کرنے کی توقع ہے۔
موصوف صدر نے ان باتوں کا اظہار بدھ کے روز یہاں اپنا ووٹ ڈالنے کے بعد نامہ نگاروں کے ساتھ بات کرنے کے دوران کیا۔انہوں نے کہا: ’خدا کا شکر ہے کہ میں نے اپنا ووٹ ڈالا میں جموں وکشمیر کے لوگوں کو مبارکباد دیتا ہوں کہ ان کو دس برسوں کے بعد یہ موقع ملا‘۔ان کا کہنا تھا: ’امید ہے کہ یہ انتخابات جموں وکشمیر میں ایک نیا باب شروع کریں گے اور مجھے پختہ یقین ہے کہ جو لوگ جیتیں گے وہ لوگوں کے احساسات اور جذبات کی صحیح ترجمانی کریں گے‘۔
نوجوانوں کے ووٹ ڈالنے پر الطاف بخاری نے کہا: ’اب حکومت کی بھی ذمہ داری ہے کہ وہ عام معافی کا اعلان کرے تاکہ نوجوانوں کو تنگ کرنے کا سلسلہ بند ہوجائے اور ان کو پاس پورٹ مل سکیں‘۔انہوں نے کہا: ’کشمیر کا نوجوان شانتی چاہتا ہے اور وہ تمام حقوق چاہتا ہے جو ملک کے باقی حصوں میں نوجوانوں کو مل رہے ہیں‘۔ان کا کہنا تھا: ’جو قیادت اقتدار میں آئے گی ان کو بھی ان نوجوانوں کے متعلق سوچنا ہوگا ان کو باعزت روزگار دینا ہوگا‘۔
غیر ملکی وفد کی آمد کے بارے میں پوچھے جانے پر موصوف صدر نے کہا:’اس سے کوئی فرق نہیں پڑتا ہے یہاں پہلے مرحلے کی پولنگ بھی صاف و شفاف طریقے سے منعقد ہوئی اور اس مرحلے کی پولنگ بھی اچھی طرح سے ہوگی‘۔