سری نگر:وزیر اعظم نریندرمودی کے سری نگر دورے کے پیش نظر شہر کو فوجی چھاونی میں تبدیل کیا گیا ہے، جگہ جگہ پولیس، بی ایس ایف، پیرا ملٹری فورس اور ایس او جی کی تعیناتی عمل میں لائی گئی ہے۔
شیر کشمیر پارک کے اردگرد علاقوں میں بھی اضافی پیرا ملٹری فورسز کو تعینات کیا گیا ہے۔
وزیر اعظم کے سری نگر دورے کے پیش نظر ڈرون اور کواڈ کاپٹروں کے آپریشن کے لئے سری نگر شہر کو ‘عارضی ریڈ زون’ قرار دیا گیا ہے
بتادیں کہ جمعرات کو وزیر اعظم نریندر مودی سری نگر میں چناوی جلسے سے خطاب کریں گے ۔
اطلاعات کے مطابق بدھ کے جموں وکشمیر کے گرمائی دارلخلافہ سری نگر میں چپے چپے پر سیکورٹی فورسز کی تعیناتی عمل میں لا کر گاڑیوں کی باریک بینی سے تلاشی لی جارہی ہیں۔
ذرائع نے بتایا کہ سری نگر شہر میں خصوصی ناکہ چیکنگ پوائنٹس قائم کئے گئے ہیں جہاں پر مشکوک نظر آنے والے افراد کو روک کر ان کے شناختی کارڈ چیک کئے جارہے ہیں۔
معلوم ہوا ہے کہ سری نگر کے حدودمیں گاڑیوں کو بغیر تلاشی کے آگے جانے کی اجازت نہیں دی جارہی ہیں۔
دریں اثنا پولیس نے ڈرون اور کواڈ کاپٹروں کے آپریشن کے لئے سری نگر شہر کو ‘عارضی ریڈ زون’ قرار دیا ہے۔
سری نگر پولیس نے ‘ایکس’ پر ایک پوسٹ میں کہا: ‘ڈرون رولز 2021 کے قاعدے 24(2) کی دفعات کے مطابق سری نگر شہر کو ڈرون اور کواڈ کاپٹروں کے آپریشن کے لئے ‘عارضی ریڈ زون’ قرار دیا گیا ہے’۔
انہوں نے پوسٹ میں کہا: ‘ریڈ زون میں تمام غیر مجاز ڈرون آپریشنز پر ڈرون رولز 2021 کی متعلقہ دفعات کے مطابق جرمانہ عائد کیا جا سکتا ہے’۔
پوسٹ میں لوگوں سے درخواست کی گئی ہے کہ وہ ذمہ دار شہری ہونے کے ناطے اس ضمن میں تعاون کریں۔
