قاضی گنڈ، پہلگام اور کوکر ناگ میں گرمی کا ریکارڈ ٹوٹ گیا

سری نگر:وادی کشمیرمیں شدید گرمی کی لہر جاری رہتے ہوئے گیٹ وے آف کشمیر کے نام سے مشہور قصبہ قاضی گنڈ میں اب تک کا سب سے زیادہ درجہ حرارت ریکارڈ ہوا ہے جبکہ پہلگام اور کوکر ناگ میں بھی گرمی کا23سالہ ریکارڈ ٹوٹ گیا ہے۔
محکمہ موسمیات کے ایک ترجمان نے بتایا کہ پیر کے روز قاضی گنڈ میں زیادہ سے زیادہ درجہ حرارت 34ڈگری سینٹی گریڈ ریکارڈ کیا گیا جو اب تک کا سب سے زیادہ درجہ حرارت یہاں پر ریکارڈ ہوا ہے۔
انہوں نے کہاکہ 31مئی 1981کو قاضی گنڈ میں زیادہ سے زیادہ درجہ حرارت 33.6ڈگری ریکارڈ ہوا تھا۔
سیاحتی مقام پہلگام میں بھی پیر کے روز 28.6ڈگری ریکارڈ ہوا جو کہ مئی کے مہینے میں ابتک کا دوسرا سب سے زیادہ درجہ حرارت ریکارڈ ہوا ہے۔
پہلگام میں 23مئی 2000کو 30.8ڈگری سینٹی گریڈ ریکارڈ کیا گیا تھا۔
محکمہ موسمیات کے مطابق کوکر ناگ میں ابتک کا دوسرا سب سے زیادہ درجہ حرارت 31.6ڈگری ریکارڈ ہوا ۔بدرواہ میں 23برسوں کے بعد مئی کے مہینے میں سب سے زیادہ درجہ حرارت 32.6ریکارڈ ہوا 15مئی 2001کو یہاں پر 34.6ڈگری ریکارڈ ہوا تھا۔
ان کے مطابق بدرواہ میں 23برسوں کے بعد آج زیادہ سے زیادہ درجہ حرارت 34.7ڈگری ریکارڈ ہوا۔
سری نگر میں دن کا درجہ حرارت 32.2، کپواڑہ میں 30.9، گلمرگ میں 22.2، جموں میں 42.8، کٹرا میں 39ڈگری ریکارڈ ہوا ہے۔
متعلقہ محکمے کے ایک ترجمان نے کہا کہ وادی میں 28 مئی تک موسم خشک رہنے کا امکان ہے اور اس دوران کہیں کہیں گرج چمک کے ساتھ ہلکی بارشوں کا امکان ہے۔
انہوں نے کہا کہ بعد ازاں وادی میں 29 سے 31 مئی تک موسم جزوی ابر آلود رہ سکتا ہے اور اس دوران بعد دوپہر کہیں کہیں گرج چمک کے ساتھ ہلکی بارشیں متوقع ہیں۔
ترجمان نے کہا کہ وادی میں 31 مئی تک موسم میں کسی بڑی تبدیلی کا کوئی امکان نہیں ہے۔
انہوں نے کہا کہ بعد میں یکم اور 2 جون کو موسم جزی طور پر ابر آلود رہ سکتا ہے۔
ان کا کہنا تھا کہ وادی میں 3 سے 5 جون تک موسم خشک رہنے کا امکان ہے۔
انہوں نے کہا تاہم اگلے چار دنوں کے دوران جموں صوبہ کے میدانی علاقوں میں گرمی کی لہر جاری رہ سکتی ہے اور وادی کشمیر اور جموں کے پہاڑی اضلاع میں موسم خشک اور گرم رہ سکتا ہے۔
محکمے نے لوگوں بالخصوص عمر رسیدہ افراد، بچوں اور مریضوں کو زیادہ مقدار میں پانی پینے اور خاص طور پر دوپہر 12 بجے سے دن کے 3 بجے تک گرمی سے بچنے کی تاکید کی ہے۔
کسانوں سے کہا گیا ہے کہ وہ اپنے آپریشنز جاری رکھ سکتے ہیں۔
دریں اثنا وادی کا شبانہ درجہ حرارت بھی مسلسل معمول سے زیادہ ریکارڈ ہو رہا ہے۔
گرمائی دارلحکومت سری نگر میں کم سے کم درجہ حرارت 15.6 ڈگری سینٹی گریڈ ریکارڈ کیا گیا جو معمول سے 3.6 ڈگری سینٹی گریڈ زیادہ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت 11.2 ڈگری سینٹی گریڈ ریکارڈ کیا گیا جو معمول سے4.1 ڈگری سینٹی گریڈ زیادہ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت 7.7 ڈگری سینٹی گریڈ ریکارڈ کیا گیا جو معمول سے 1.6 ڈگری سینٹی گریڈ زیادہ ریکارڈ ہوا تھا۔
سرحدی ضلع کپوارہ میں کم سے کم درجہ حرارت 12.0 ڈگری سینٹی گریڈ ریکارڈ کیا گیا جو معمول سے1.4 ڈگری سینٹی گریڈ زیادہ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 12.4 ڈگری سینٹی گریڈ ریکارڈ کیا گیا جو معمول سے1.7 ڈگری سینٹی گریڈ زیادہ ریکارڈ ہوا تھا۔