جمالٹہ سری نگر میں آتشزدگی کی بھیانک واردات 6 رہائشی مکانوں کو نقصان، معمر شہری جاں بحق، دو کو زندہ بچایا گیا

جمالٹہ سری نگر میں آتشزدگی کی بھیانک واردات 6 رہائشی مکانوں کو نقصان، معمر شہری جاں بحق، دو کو زندہ بچایا گیا

سری نگر: جموں وکشمیر کی گرمائی راجدھانی سری نگر کے جمالٹہ علاقے میں آگ کی ایک ہولناک واردات میں چھ رہائشی مکانوں کو نقصان پہنچا ہے جبکہ فائر اینڈ ایمرجنسی عملے کی بروقت کارروائی کے نتیجے میں رہائشی مکان میں پھنسے تین افراد کو بچایا گیا تاہم مالک مکان دم گھٹنے سے جاں بحق ہوا۔فائر اینڈ ایمرجنسی کے ڈپٹی ڈائریکٹر نے بتایا کہ جمالٹہ میں آتشزدگی کی واردات میں تین رہائشی مکان خاکستر ہوئے ہیں۔انہوں نے بتایا کہ فائر اینڈ ایمرجنسی کے اہلکاروں نے اپنی جانوں کو جوکھم میں ڈال کر ایک ہی کنبے کے تین افراد جو کہ آگ کے شعلوں میں پھنس کر رہ گئے تھے کو بچایا تاہم مالک مکان کی دم گھٹنے سے موت واقع ہوئی۔اطلاعات کے مطابق پائین شہر کے گنجان آبادی والے علاقے جمالٹہ سری نگر میں جمعرات کی شام کو رہائشی مکان سے آگ نمودار ہوئی جس نے آناًفاناً اپنے متصل مزید دو کو لپیٹ میں لے لیا۔معلوم ہوا ہے کہ فائر اینڈ ایمرجنسی کے ڈپٹی ڈائریکٹر عاقب احمد کی سربراہی میں فائر مین فوری طورپر جائے موقع پر پہنچے اور آگ بجھانے کی کارروائی شروع کی۔نامہ نگار نے بتایا کہ تنگ گلی کوچوں کی وجہ سے فائر اینڈ ایمرجنسی عملے کو آگ بجھانے کی کارروائی کے دوران دقتوں کا سامنا کرناپڑا تاہم اس کے باوجود بھی انہوں نے کمال جرائت کا مظاہرہ کرکے آگ پر قابو پایا۔انہوں نے مزید کہاکہ رہائشی مکان کے اندر پھنسے ہوئے تین افراد کو فائر اینڈ ایمرجنسی عملے کے اہلکاروں نے ریسکیو کیا تاہم مالک مکان جس کی شناخت 50سالہ بشیر احمد کے بطور ہوئی کی دم گھٹنے سے موت واقع ہوئی ہے۔مقامی لوگوں نے بتایا کہ آگ کی اس واردات میں چھ رہائشی مکانوں کو نقصان پہنچا جبکہ تین مکمل طورپر خاکستر ہوئے ہیں۔انہوں نے کہاکہ فائر اینڈ ایمرجنسی کے اہلکاروں نے کمال جرائت کا مظاہرہ کرکے رہائشی مکان میں پھنسے ہوئے ایک ہی کنبے کے تین افراد کو باہر نکالا تاہم مالک مکان ہسپتال میں جانبر نہ ہو سکا۔دریں اثنا ڈپٹی ڈائریکٹر فائر اینڈ ایمرجنسی عاقب احمد نے نامہ نگاروں سے بات چیت کے دوران بتایا کہ جمالٹہ سری نگر میں جمعرات کی شام چھ بجے رہائشی مکان سے آگ نمودار ہونے کی اطلاع ملتے ہی فائر ٹینڈر جائے موقع پر پہنچے۔انہوں نے بتایا کہ جوں ہی ہم جائے وقوع پر پہنچے تو ہمیں پتہ چلا کہ جس رہائشی مکان سے آگ نمودار ہوئی وہاں پر تین افراد آگ کی لپٹوں میں پھنس کر رہ گئے ہیں۔انہوں نے کہاکہ فائر اینڈ ایمرجنسی کے اہلکاروں نے اپنی جانوں کو خطرے میں ڈال کر تینوں کو آگ کی لپٹوں سے باہر نکال کر ہسپتال پہنچایا تاہم مالک مکان جس کی شناخت بشیر احمد کے بطور ہوئی ہے کی دم گھٹنے سے موت واقع ہوئی ہے۔ڈپٹی ڈائریکٹر نے عوام الناس سے اپیل کی ہے کہ وہ گلی کوچوں اور شاہراوں پر گاڑی پارک کرنے سے گریز کریں۔انہوں نے بتایا کہ جوں ہی ہم جمالٹہ پہنچے تو یہاں پر شاہراوں پر گاڑیاں پارک کی گئی تھیں جس وجہ سے فائر عملے کو اندر تک جانے میں مشکلات کا سامنا کرناپڑا۔

Leave a Reply

Your email address will not be published.