موصوف باغ مالک نے کہا کہ وادی میں سال 2014 سے 2019 تک ناساز گار موسمی حالات و دیگر مسائل کی وجہ سے بادام کی فصل کافی متاثر رہی۔انہوں نے کہا: ‘ اس وقفے کے دوران کسان اپنے باغوں کا خاطر خواہ خیال نہیں رکھ سکے جس کے باعث پیدا وار میں کمی واقع ہوئی’۔ان کا کہنا تھا: ‘امسال پیدا وار کم ہے لیکن مارکیٹ میں ریٹ تسلی بخش ہے’۔ناساز گار موسمی صورتحال سے اس سال فصل اتارنے کے کام میں بھی تاخیر ہوئی۔
جاوید احمد نے کہا کہ بیرونی ممالک کے یہاں کے بازاروں میں بادام کی دستیابی سے کشمیری بادام کی مانگ اور ریٹ پرکوئی اثر نہیں پڑا ہے۔ بازار میں کشمیری بادام کی مانگ برابر قائم ہے اور اس بادام کو بہت پسند کرتے ہیں اور شوق سے اس کی خریداری کی جاتی ہے۔ان کا کہنا تھا: ‘ہم بادام کو صاف کرکے سوکھاتے ہیں اور پھر بیوپاری کو بیچتے ہیں’۔
موصوف نے کہا کہ امسال کاغذی بادام کی ریٹ 255 روپیے فی کلو ہے جبکہ دوسرے قسم کے بادام کی ریٹ 150 روپیے فی کلو ہے۔
انہوں نے کہا: ‘تاہم وادی میں بادام کے باغ ختم ہو رہے ہیں کیونکہ لوگ نئے بادام باغ نہیں لگا رہے ہیں یہاں سیب باغ لگانے کو ترجیح دی جا رہی ہے’۔ان کا کہنا تھا: ‘یہاں جو پرانے وقت میں باغ لگائے گئے ہیں ان کو بھی کاٹا جا رہا ہے نئے بادام باغ کوئی لگانے کے لئے تیار نہیں ہے’۔
جاوید احمد نے کہا کہ محکمہ باغبانی بھی یہاں بادام باغوں کی طرف کوئی توجہ نہیں کر رہی ہے۔انہوں نے کہا: ‘متعلقہ محکمہ اس صنعت سے وابستہ سے کسانوں کو کوئی نئی ٹیکنالوجی یا دوسری ضروری چیزیں یا مشورے نہیں دے رہا ہے’۔ان کا کہنا تھا: ‘ہم اپنے تجربے کی بنیاد پر باغوں کی دوا پاشی کرتے ہیں اور باغوں کی باقی دیکھ ریکھ بھی اپنے تجربے کے لحاظ سے ہی کر رہے ہیں’۔
موصوف نے کہا کہ جس طرح سیب کے باغ لگانے کے لئے محکمہ کسانوں کی بھر پور رہنمائی کر رہا ہے اسی طرح بادام کے باغ لگانے کے لئے بھی کسانوں کو مشورے فراہم کرنے کی ضرورت ہے۔ ایسا کرنے سے کشمیری بادام نایاب ہونے سے بچ سکتے ہیں۔
قابل ذکر ہے کہ ایک زمانے میں کشمیر کے بعض علاقوں میں سیب سے زیادہ بادام کے باغات نظر آ رہے تھے لیکن بعد میں سیب کے باغ لگانے کا رجحان بڑھنے کے ساتھ ہی یہ باغات معدوم ہونے لگے اور اب کہیں کہیں ہی یہ باغ نظر آ رہے ہیں۔اس صنعت سے وابستہ لوگوں کا ماننا ہے کہ سیب کے مقابلے میں بادام کی کم ریٹ یہ باغ کم ہونے کی بنیادی وجہ ہے۔انہوں نے کہا کہ اگر چہ سیب باغ تیار کرنے میں کافی محنت درکار ہے تاہم اس کا منافع بھی تسلی بخش ہوتا ہے۔
