سری نگر 24فروری: جموں وکشمیر کے ضلع ڈوڈہ میں 18سالہ نوجوان کی دم گھٹنے سے موت واقع ہوئی جبکہ اُس کے ساتھی کو بے ہوشی کی حالت میں ہسپتال پہنچایا گیا۔
سرکاری ذرائع نے بتایا کہ 18سالہ شہنواز حسین اور 22 سالہ عادل حسین شیخ ساکنان دھرم تحصیل گول رام بن جو کہ ڈوڈہ کے کھاریا ہوٹل میں کام کر رہے تھے کو کرایہ کے کمرے میں بے ہوشی کی حالت میں پایا گیا۔
انہوں نے بتایا کہ دونوں کو فوری طورپر نزدیکی ہسپتال لے جایا گیا تاہم ڈاکٹروں نے شہنواز حسین کو مردہ قرار دیا جبکہ اُس کے دوست عادل کی حالت خطرے سے باہر بتائی جارہی ہے۔
ابتدائی تحقیقات کے دوران معلوم ہوا ہے کہ سردی سے بچنے کی خاطر دونوں نے کرایہ کے کمرے میں ایک گیس ہیٹر کا استعمال کیا تھا ۔
پولیس ذرائع نے بتایا کہ بظاہر نوجوان کی موت دم گھٹنے کی وجہ سے ہوئی ہے تاہم پولیس کا کہنا ہے کہ موت کی اصل وجہ جاننے کے لئے تحقیقات شروع کر دی گئی ہیں۔
یو این آئی
